TBI: چاوەڕوانی حکومەتی هەرێمی کوردستانین بۆ بەبانکیکردنی مووچە

ئاڤا نیوز

 

بانکی (TBI)، ڕوونکردنەوەیەکی لەبارەی بەبانکیکردنی (تەوتین) مووچەی فەرمانبەرانی هەرێمی کوردستان بڵاو کردەوە و پابەندبوونی بە بڕیاری دادگەی فیدڕاڵیی عێراق دووپات کردەوە.

 

ڕاگەیێنراوی فەرمی: بانکی بازرگانیی عێراق (TBI) لە ڕوونکردنەوەیەکەدا ڕایگەیاند: پرسیاری زۆریان لەبارەی میکانیزمەکانی بەبانکیکردنی مووچەی فەرمانبەرانی هەرێمی کوردستان بەدەست گەیشتووە و ئەوان پابەندن بە بڕیارەکەی دادگەی باڵای فیدراڵی و هەر وەک بانکە مۆڵەتپێدراوەکانی بانکی ناوەندیی عێراق، ئامادەی بەبانکیکردنی مووچەی مووچەخۆرانی هەرێمی کوردستانن.

 

زانیاریی زیاتر: بانکەکە دووپاتی دەکاتەوە کە توانای پراکتیکی بەرز و تۆکمەی هەیە بۆ تەواوکردنی پڕۆسەی بەبانکیکردنی مووچەی مووچەخۆرانی هەرێمی کوردستان "بۆ ئەو فەرمانبەرانەی کە خواستیان لەسەر هەڵبژاردنی بانکی بازرگانیی عێراق هەیە لە هەرێمی کوردستان".

 

بۆچوونی لایەنی بەرامبەر: پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی ڕاگەیاند: "بەشداری TBI بژاردەی زیاتر دەخاتە بەر دەست، بۆ ئەمەش هاندان و تامەزرۆیی زیاتر دەداتە بەشداریکردنی هاووڵاتیان لە بانکی زیاتری  نێو پڕۆژەی هەژماری من" و پێشتریش هەر لەمبارەوە ئاڤا نیوز لێدوانی 'بیلال سەباح حوسێن' بەڕێوەبەری گشتیی بانکەکەی وەرگرتبوو.

 

ڕێککەوتنەکە بم شێوەیەیە: بانکەکە لە چوارچێوەی بەبانکیکردنی مووچەی فەرمانبەران، چاوەڕوانی حکومەتی هەرێمی کوردستانە بۆ پێدانی زانیاری لەسەر لیستی ناوی فەرمانبەران "بۆ ئەوەی پڕۆسەکە دەست پێ بکەین".