ژمارەیەک چەکداری داعش لە مووسڵ دەستگیرکران

ئاڤا نیوز

 

شانەی ڕاگەیاندنی ئەمنیی عێراق هەڵوەشانەوەی شانەیەکی سەر بە ڕێکخراوی داعشی لە پارێزگای نەینەواو دەستگیرکردنی ئەندامەکانی ڕادەگەیێنێت.

 

بۆچی گرنگە: ماوەی چەند ڕۆژێکە جموجوڵەکانی داعش لە ناوچە جیاجیاکانی عێراق زیادی کردووە، لە ماوەی ئەو چەند ڕۆژەدا هێرشیان کردووەتە سەر خاڵە ئەمنییەکانی سوپای عێراق.

 

ڕاگەیێنراوی فەرمی: شانەی ڕاگەیاندنی ئەمنیی عێراق ڕایگەیاند: لە دوو ئۆپەراسیۆنی جیا لە پارێزگای نەینەوا، توانرا تۆڕێکی سەر بە ڕێکخراوی داعش لە شاری مووسڵ هەڵبوەشێنرێتەوە و ئەندامەکانی دەستگیر بکرێن کە چوار کەس بوونە.

 

زانیاریی زیاتر: هێزە عێراقییەکان بەردەوامن لە گەڕان بەدوای پاشماوەکانی داعش لە پارێزگا جیاوازەکانی وڵات، بەتایبەتی کە ئەندامەکانی هەندێک جار کارمەندانی سوپا و پۆلیس لە ڕێگەی هێرشی چەکدارییەوە دەکەنە ئامانج.