ئەمریكا و ئێران لەسەر گرژییەكانی ڕۆژهەڵاتی ناوەڕاست گفتوگۆ دەكەن

ئاڤا نیوز

 

پێگەی ئاكسیۆس ئاشكرای كردووە، دوو گەورە بەرپرسی ئەمریكا هەفتەی ڕابردوو گفتوگۆی ناڕاستەوخۆیان لەگەڵ بەرپرسانی ئێران كردووە، تاوەکو گرژییەكانی ناوچەكە كەمتر ببنەوە.

وێنە گەورەكە: مانگی چواری ئەمساڵ، گرژی نێوان ئێران و ئیسرائیل زیاتر بوو، كاتێک ئێران 300 مووشەک و درۆنی ئاراستەی ئیسرائیل كرد، وەک وەڵامێک بۆ ئەو هێرشەی ئیسرائیل كردیە سەر كۆنسوڵخانەی ئێران لە دیمەشقی پایتەختی سووریا و بەهۆیەوە حەوت بەرپرسی ئێرانی كوژران.

ئەوەی پێویستە بیزانیت: پێگەی ئاكسیۆس لە ڕاپۆرتێكدا ئەوەی ئاشكرا كردووە، لە گفتوگۆكاندا كە كۆتایی هەفتەی ڕابردوو بەڕێوە چووە، برێت مەكگۆرگ ڕاوێژكاری جۆ بایدن سەرۆكی ئەمریكا بۆ كاروباری ڕۆژهەڵاتی ناوەڕاست و ئیبرام بالی ڕێكخەری كاروباری ئەمریكا لە ئێران بەشدارییان كردووە، بەڵام ناوی بەرپرسە ئێرانییەكانی ئاشكرا نەكردووە.

 

زانیاریی بەدەستهاتوو: گفتوگۆکان بەشێوەی ناڕاستەوخۆ لە سەڵتەنەتی عومان بەڕێوە چوون، بۆ ڕێگریکردنیش بووە لە فراوانبوونی شەڕ لە ناوچەکە، باسی بەرنامە ئەتۆمییەکەی ئێران کراوە و ئەمریکا نیگەرانیی خۆی گەیاندووەتە ئەو وڵاتە.