لە ئێران 15 ژن بە 75 ساڵ زیندانی سزا دران

ئاڤا نیوز 

دادگەی پارێزگای شاری ئیسفەهانی ئێران، بە تۆمەتی پڕوپاگەندە کردن بۆ ئایینەکەیان، سزای 75 ساڵ زیندانی بۆ 15 ژنی بەهایی دەرکرد.

وێنە گەورەکە: زیاتر لە 300 هەزار هاووڵاتیی بەهایی لە ئێران دەژین و ڕێگەی پڕوپاگەندەی ئایینییان پێ نادرێت، چونکە بە پێی دەستووری ئێران تەنیا ئایینە ئاسمانییەکان و زەردەشتیەت ڕێگە پێدراون.

 
ڕاگەیێنراوی فەرمی: ناوەندی هێرانا بۆ مافی مرۆڤ لە ئێران بڵاوی کردەوە: ئەو 15 ژنە بە تۆمەتی "بەشداری لە چالاکییەکان و بانگەشە بۆ ئایینی بەهائی و سەرپێچی لە ئایینی ئیسلام" سزا دراون.

زانیاریی زیاتر: ئەو 15 ژنە لە ئەسفەهان دەژین، جگە لە سزا زیندانی، 750 ملیۆن تمەنیشیان وەک سزای پێبژاردن و دەرنەچوون لە ئێران و بەشدارنەبوون لە چالاکییە کۆمەڵایەتییەکانیان بەسەردا دراوە.

 
باکگراوند: ئایین یا مەزهەبی بەهایی، یەکتاپەرەستییە و شوێنکەوتووانی لەو بڕوایەدان بەهائوڵا (1817 ـ 1892)، نوێترین و کۆتا هەناردەکراوی یەزدانە لە زنجیرەی پێغەمبەرە نێردراوەکان کە بۆ یەکگرتن و ئاشتیی مرۆڤایەتی نێردراوە و سووڕی ئایینیش بە کۆتایینەهاتوو هەژمار دەکەن.