لە بەغدا وردبینیی بۆ مووچەی هێزە ئەمنییەکان کرا

ئاڤا نیوز 

وەزارەتی دارایی ‌حکومەتی هەرێمی کوردستان، لیستی مووچەی مانگی چواری مەدەنی و هێزە ئەمنییەکانی پێکەوە بۆ بەغدا ناردووە و وەزارەتی دارایی عێراقیش ڕۆژی 16-5-2024 وردبینی تەواو كردووە.

بۆچی گرنگە: ‌وەزارەتی دارایی حکومەتی هەرێمی کوردستان مانگانە لیستی مووچەی مووچەخۆران ڕەوانەی بەغدا دەکات، تاوەکو کێشە لە دواکەوتنی مووچە دروست نەبێت و وەزارەتی دارایی عێراقیش هیچ بیانوویەکی بۆ نەناردن و دواخستنی مووچە نەمێنێت.

لێدوانی فەرمی: سەرچاوەیەکی باڵا لە وەزارەتی دارایی بە ئاڤا نیوزی گوت: بە گوێرەی زانیارییەکانمان تا ڕۆژی پێنجشەممە 16-5-2024 وەزارەتی دارایی عێراق وردبینیی لیستی هێزە ئەمنییەکانی تەواو کردووە، ئەوەی ماوەتەوە فەرمانی خەرجکردن و تەمویلکردنیەتی.

زانیاریی زیاتر: لیستی ناوی هێزە ئەمنییەکان بە کۆد بۆ بەغدا نێردراوە، بڕیارە بەم نزیکانە لەلایەن وەزارەتی دارایی عێراقەوە تەمویل بکرێت و لە هەرێمی کوردستان مووچەکە بدرێت.

ئەوەی پێویستە بیزانیت: وەزارەتی دارایی حکومەتی هەرێمی کوردستان، بۆ مانگی پێنج داوای لیستی ناوەکانی لە سەرجەم فەرمانگە و وەزارەتەکان کردووە.