لە پەرلەمانی عێراق شەڕ ڕوویدا و ژمارەیەک پەرلەمانتار بریندار بوون

ئاڤا نیوز

 

بەهۆی ناکۆکیی نێوان دوو لایەنی سوننە، شەڕ و ئاڵۆزی لەنێو پەرلەمانی عێراق ڕوویدا و بەهۆیەوە ژمارەیەک پەرلەمانتار برینداربوون.

 

وێنە گەورەکە: دوای شەش مانگ هێشتا پۆستی سەرۆکی پەڕلەمان یەکلایی نەکراوەتەوە و تا ئێستا شەش هەوڵ بۆ یەکلاکردنەوەی شکستی هێناوە، ئەمشەویش بەهۆی گرژی جارێکی دیکە پڕۆسەکە شکستی هێنا و دانیشتنی پەرلەمان دواخرا.

 

لێدوانی فەرمی: زۆزان کۆچەر، ئەندامی پەرلەمانی عێراق بە ئاڤا نیوزی ڕاگەیاند، "پەڕلەمانتارانی تەقەدووم داوایان کرد دووبارە دەرگای خۆبەربژێرکردن بکرێتەوە و لایەنەکانی دیکەی سوننەش دژ بەو داوایە وەستانەوە و بەو هۆیەوە ئاڵۆزی دروست بووە."

 

زانیاریی زیاتر: سەرەتا دەمەقاڵێ دروست بووە و دواتریش بووە شەڕبۆکس و بەو هۆیەوە ژمارەیەک پەرلەمانتار بریندارببوون، کە یەکێک لەوانە هەیبەت حەلبووسی لە حیزبی تەقەدوومە و سەری شکاوە.

 

ئەوەی پێویستە بیزانیت: بۆ کۆنتڕۆڵکردنی ئاڵۆزییەکان، هێزە ئەمنییەکانی پاسەوانی پەڕلەمان هاتنە نێو هۆڵەکە و دانیشتنەکە دواخرا.