نزیکەی دوو هەزار کەس بە تۆمەتی بازرگانیكردن بە مرۆڤەوە دەستگیركراون

ئاڤا نیوز

لە پێنج مانگی ڕابردوودا هەزار و 800 کەس لە عێراق بە تۆمەتی بازرگانیكردن بە مرۆڤ دەستگیركراون.

لێدوانی فەرمی: سەرمەد موسەدق، بەڕێوەبەری بەڕێوەبەرایەتی بەرەنگاربوونەوەی بازرگانیکردن بە مرۆڤ لە وەزارەتی ناوخۆی عێراق ڕایگەیاند: لە ماوەی پێنج مانگی ڕابردوودا هەزار و 800 کەس دەستگیرکراون کە بە شێوەیەکی نایاسایی هاتوونەتە ناو عێراق و تۆمەتبارن بە بازرگانیکردن بە مرۆڤەوە، زۆربەیان هەڵگری وڵاتینامەی سووریان.

زانیاریی زیاتر: لەبارەی دزین و بازرگانیکردن بە منداڵانەوە، سەرمەد موسەدق گوتی: زیاتر ئەو ڕووداوانە لە شوێنە قەرەباڵغەکان ڕوودەدەن، حاڵەتی دیکەش هەیە منداڵ ڕاستەوخۆ لەلایەن باوک یان دایکەوە بە خێزانە دەوڵەمەندەکان یان خێزانە بێ منداڵەکان دەفرۆشرێن.

ئەمەش بزانە: بەگوتەی ئەو بەرپرسەی وەزارەتی ناوخۆی عێراق منداڵێکی کور بە  10 بۆ 15 ملیۆن، منداڵێکی کچیش لە پێنج بۆ حەوت ملیۆن دینار دەفرۆشرێت.

ئەوەی پێویستە بیزانیت: بازرگانیکردن بە مرۆڤ بەپێی یاسایی عێراقی تاوانە.