شاندێکی هەرێمی کوردستان بۆ بە بازاڕکردنی گەنمی جووتیاران لە بەغدایە

ئاڤا نیوز

شاندێکی حكومەتی هەرێمی کوردستان بۆ بە بازاڕکردنی گەنمی جووتیاران لە بەغدایە، شاندەکە دەیانەوێت بڕ و نرخی گەنمی جووتیارانی هەرێمی کوردستان بۆ ئەمساڵ دیاری بکەن.

لێدوانی فەرمی: "شاندەکە بە سەرۆکایەتی بێگەرد تاڵەبانی، وەزیری کشتوکاڵ و سەرچاوەکانی ئاو چوونەتە بەغدا بۆ چارەسەرکردنی کێشەی ساڵانی ڕابردوو و بە بازاڕکردنی گەنمی جووتیارانی هەرێمی کوردستان ". هیوا عەلی گوتەبێژی وەزارەتی کشتوکاڵ ئەمەی بە ئاڤا نیوز ڕاگەیاند.

زانیاریی زیاتر: وەزارەتی بازرگانی عێراق بۆ ئەمساڵ شەش ملیۆن تۆن گەنم وەردەگرێت، هەوڵێک هەیە لەو ڕێژەیە هاوشێوەی ساڵی پار تەنیا 500 هەزار تۆن گەنم لە هەرێمی کوردستان وەربگرێت، بەڵام وەزارەتی کشتوکاڵی حکومەتی هەرێمی کوردستان داوا دەکات بەپێی ڕووبەری داچێنراو گەنم لە جووتیاران وەربگیرێت، بۆ هەر تۆنێک 850 هەزار دینار دیاری بکرێت. هیوا عەلی وای گوت.

ئامارەکان وا دەڵێن: لە هەرێمی کوردستان بۆ ئەمساڵ 50 هەزار جووتیار، نزیکەی سێ ملیۆن دۆنم زەوییان بە گەنم داچاندووە، چاوەڕوان دەکرێت سەروی دوو ملیۆن تۆن گەنم بەرهەم بهێنرێت.