لە کەرکووک پڕۆسەی وەرگرتنی گەنمی جووتیارانی کورد دەستپێدەکات

ئاڤا نیوز

 

بڕیارە لە سەرەتای هەفتەی داهاتوو بەڕێوەبەرایەتیی کشتوکاڵی کەرکووک دەست بە وەرگرتنی گەنمی جووتیارانی کورد بکات. 

 

وێنە گەورەکە: زیاتر لە 10 ڕۆژە سایلۆکانی وەرگرتنی گەنمی جووتیارانی سنووری کەرکووک کراونەتەوە، بەهۆی دروستکردنی بەربەست لەبەردەم دروێنەی جووتیاران لە سنووری پارێزگای کەرکووک، گەنمی جووتیارە کوردەکان نەبراوەتە سایلۆکان.

 

لێدوانی فەرمی: زوهێر عەلی، بەڕێوەبەری کشتوکاڵی کەرکووک بە ئاڤا نیوزی گوت، "لە ڕۆژی یەکشەممەوە دەست بە وەرگرتنی گەنمی ئەو جووتیارانە دەکەین، کە لەدەرەوەی پلانی کشتوکاڵیدان".

 

لەلایەکی دیکەوە: محەممەد ئیسماعیل، نوێنەری جووتیارانی سەرگەڕان بە ئاڤا نیوزی ڕاگەیاند، "کێشەی دروێنەی جووتیاران نەماوە، ناو و بڕی  گەنمی خۆیان لە بەڕێوەبەرایەتیی کشتوکاڵ تۆمارکردووە.

 

ئەوەی پێویستە بیزانیت: وەرگرتنی گەنم لە چوارچێوەی  پلانی کشتوکاڵی، ئەو زەویانە دەگرێتەوە کە موڵکەکە بەناوی جووتیارەکەوە تۆمارکرابێت، ئەمساڵ 400 هەزار تۆن لەدەرەوەی  چوارچێوە پلانی کشتوکاڵی لە کەرکووک وەردەگیرێت.