ئانۆ جەوهەر: هێڵی خواری پڕۆژەی ڕێگەی گەشەپێدان ڕاستکرایەوە

ئاڤا نیوز

 

وەزیری گواستنەوە و گەیاندن ڕایگەیاند، ئەو پێشنیازەی سەرۆکوەزیران بارزانی بۆ ڕێگەی گەشەپێدان پێشکەشی کرد، واژۆکرا.

 

بۆچی گرنگە: ڕێگای گەشەپێدانی ئابووریی دەبێتە هۆی زیادکردنی داهاتی هەرێمی کوردستان، سەرەڕای ئەوەش بە ڕێگەیەکی ستراتیژی دادەنرێت و عێراق و بەشێک لە وڵاتانی کەنداو لەڕێی هەرێمی کوردستانەوە بە تورکیا و ئەوروپا دەبەستێتەوە.

 

لێدوانی فەرمی: ئانۆ جەوهەر وەزیری گواستنەوە و گەیاندنی هەرێمی کوردستان ڕایگەیاند: سوپاسی پشتگیری سەرۆکوەزیران بارزانی دەکەین کە قۆناغ بە قۆناغ لە هەموو هەنگاوەکان لەگەڵمان بوو و توانرا زۆر گرێ کوێرە بکرێنەوە و هێلی خواری پلان و پڕۆژەی [ڕێگەی گەشەپێدان] ڕاست بکرێنەوە، بەشێوەیەک کە بە باشترین شێوە لە خزمەتی خەڵکی کوردستان و عێڕاق بێت.  

 

زانیاریی زیاتر: هەرێمی کوردستان پیشنیازی ئەوەیکرد ڕێگەکە لە فاو تا موسڵ دەستوەردانی تێدا نەکرێت، کاتێکیش ڕێگەکە نزیکی سنووری هەرێمی کوردستان دەبێتەوە، دەبێ بە ڕۆژهەڵاتی ڕووباری دیجلە بۆ دەشتی نەینەوا نزیک تەلکێف بڕوات، دواتر بۆ سمێڵ تا دەگات بە دێرەبوون، پاشان بۆ سنووری عێراق-تورکیا لە گوندی قەرەوڵەوە تێپەڕ ببێت.

 

لەلایەکی دیکەوە: ئەو پێشنیازەی حکومەتی هەرێمی کوردستان پێشکەشی کردووە، 32 کیلۆمەتر نزیکترە، هاوکات لە ڕووی ئەندازیارییەوە باشتر دەتوانرێت ئەنجامبدرێت و تێچووەکەشی کەمترە.