شارەزایەکی سەربازی: لە هەرێمی کوردستان ئەمنییەتی ڕێگەی گەشەپێدان  100% دەپارێزرێت

ئاڤا نیوز

 

شارەزایەکی سەربازی پێیوایە، تێپەڕینی ڕێگەی گەشەپێدان بە هەرێمی کوردستان لە ڕووی ئەمنییەوە گەرەنتیکراو دەبێت، بەڵام بۆ ئەو ڕێگەیەی کە عێراق دیاری کردبوو، ئەو گەرەنتییەی نییە.

 

وێنە گەورەکە: لەسەر پێشنیازی سەرۆکوەزیران بارزانی، هەرێمی کوردستان بووە بەشێک لە ڕێگەی گەشەپێدان و دوێنێ کۆنووسی پێشنیازەکەیان پەسەند کرد بۆ ئەوەی لە بەغدا دوای گفتوگۆ بخرێتە نێو دیزاینی پڕۆژەکەوە.

 

بۆچی گرنگە: دوای تەواوبوونی پڕۆژەی ڕێگەی گەشەپێدان، دەتوانرێت ساڵانە 22 ملیۆن تۆن لەو ڕێگەیە بگوازرێتەوە. لە کۆ ڕێگەکە، 117 کیلۆمەتری لەنێو خاکی هەرێمی کوردستانە تا دەگاتە ئۆڤۆکۆی خاکی تورکیا.

 

لێدوانی فەرمی: لیوا سەباح دوسکی، شارەزایی سەربازی بە ئاڤا نیوزی گوت: "من دڵنیام سەرۆکوەزیران بارزانی دەتوانێت 100% دڵنیایی بدات لەوەی کە هەر شتێک لە ڕێگەی گەشەپێدانەوە بە هەرێمی کوردستان تێپەڕێت بە سەلامەت لە خوارووی عێراق دەگاتە تورکیا و ئەوروپا و بە پێچەوانەشەوە، بەڵام بۆ ئەو ڕێگە پێشنیازکراوانی عێراق کە لە دەرەوەی هەرێمی کوردستانن، ئەو دڵنیاییە نییە و بەغداش ناتوانێت گەرەنتی بکات".

 

زانیاریی زیاتر: ئەو لیوایە ئاماژەی بەوەش کرد، ئەو ڕێگەیەی کە عێراق دەیەوێت بە دەرەوەی هەرێمی کوردستان تێپەڕێت، بەهۆی تێپەڕینی بە ناو خاکی سوریا و بوونی چەندین گرووپی چەکداریش لەسەر ڕێگەکە، هەم ئێستا و هەم لە ئایندەش مەترسیدارە، چونکە ئەو گرووپانە خۆیان هۆکاری تێکدانی سەقامگیری ڕێگەکەن.

 

لەلایەکی دیکەوە: د. ڕێبەر فەتاح، شارەزای ئابووری بە ئاڤا نیوزی ڕاگەیاند، تێپەڕینی ڕێگەی گەشەپێدان بە هەرێمی کوردستان چەندین سوودی ئابووری هەیە، چونکە تێپەڕینەکە بە شارەکاندا، دەرفەتی کار و جموجۆڵی بازرگانیی زیاتر دابین دەکات و هەموو پێکهاتەکان لێی سوودمەند دەبن.