لەسەر داوای کام لایەن ڕۆژی کیمیا بارانکردنی هەڵەبجە کرایە پشوو؟

ئاڤا نیوز 

 

ئەنجوومەنی نوێنەرانی عێراق، ڕۆژی کیمیا بارانکردنی هەڵەبجە و ئەنفالی وەک پشوو لە سەرانسەری عێراق دیاری کرد، ئەوەش لەسەر داوای سەرجەم فراکسیۆنە کوردستانییەکان بووە و پاڵپشتیی لایەنەکانی دیکەیان بۆ ئەو مەبەستە کۆ کردووەتەوە.

 

وێنە گەورەکە: ئەنجوومەنی نوێنەرانی عێراق 11 ڕۆژی دیکەی وەک پشوو لە عێراق دیاری کرد کە یەکێکیان ڕۆژی کیمیا بارانکردنی هەڵەبجە و ئەنفال بووە. 

 

چیرۆکی سەرەکی: فراکسیۆنە کورستانییەکان بە یەکەوە گفتوگۆ دەکەن، دواتر لەنێو پێنج ئەندامی فراکسیۆنی جیاواز بە یەکەوە دەڕۆنە لای د. شاخەوان عەبدوڵا، جێگری سەرۆکی ئەنجوومەنی نوێنەرانی عێراق و داوای لێدەکەن ئەو دوو یادە بۆ کوردیش بکرێتە پشوو و لە نێو هەمواری یاسای پشووە فەرمییەکانی عێراق جێگەی بکرێتەوە.

 

لێدوانی فەرمی: د. سەباح سوبحی، ئەندامی ئەنجوومەنی نوێنەرانی عێراق کە یەکێک بووە لەو پێنج ئەندامە بە ئاڤا نیوزی ڕاگەیاند: "دوای داواکارییەکەی ئێمە د.شاخەوان داوای لە هەردوو لیژنەی ئەوقاف و یاسایی کرد، لەنێو هەمواری یاسای پشووە فەرمییەکان، ئەم دوو یادەی کوردیش زیاد بکرێت، لە کاتی دەنگدان یادی کیمیابارانکردنی هەڵەبجە دەنگی هێنا و یادی ئەنفالیش تێکەڵی پشووەکە کرا".