لە پێنج مانگدا 350 هەزار دەنگدەر کارتی بایۆمەترییان وەرگرتووەتەوە

ئاڤا نیوز
 

کۆمیسیۆنی هەڵبژاردنەکانی عێراق، کارتی بایۆمەتری ڕادەستی ئەو کەسانە دەکاتەوە کە زانییارییەکانی خۆیان نوێ کردووەتەوە بۆ بەشداریکردن لە هەڵبژاردنی پەرلەمانی کوردستان و تا ئێستا نزیکەی 350 هەزار کارتی بایۆمەتری ڕادەستی هاونیشتمانیان کردووەتەوە.

 

بۆچی گرنگە: بەبێ وەرگرتنەوەی کارتەکانی دەنگدان، دەنگدەر ناتوانێت بەشداری لە هەڵبژاردنەکانی داهاتووی کوردستان و عێراق بکات. 

 

ڕاگەیێنراوی فەرمی: جومانە غەلای، گوتەبێژی کۆمسیۆنی باڵای سەربەخۆی هەڵبژاردنەکانی عێراق بە ئاڤا نیوزی ڕاگەیاند، "لە سەرەتای ئەمساڵەوە تا 23ی ئەم مانگە، 348 هەزار و 27 دەنگدەر کارتی بایۆمەتری خۆیان لە هەر سێ پارێزگای، هەولێر، دهۆک و سلێمانی وەرگرتووەتەوە."

 

ژمارەکان وادەڵێن: لە هەولێر 120 هەزار و 239 دەنگدەر، و 90 هەزار و 746 دەنگدەر لە دهۆک و 137 هەزار و 42 دەنگدەر لە سلێمانی کارتی بایۆمەرتی خۆیان وەگرتووەتەوە.