ڕۆژنامەنووسێکی عێراقی بۆ مستەفا سەنەد: پیاوی دەوڵەت بە نەک ڤلۆگەر

ئاڤا نیوز

ڕۆژنامەنووسێکی دیاری عێراقی، هێرش دەکاتە سەر مستەفا سەنەد پەرلەمانتاری شیعە و پێی دەڵێت "وەکو پیاوی دەوڵەت ڕەفتار بکە نەک وەکو ڤلۆگەر".

چیرۆکی سەرەکی: مستەفا سەنەد پەرلەمانتاری شیعە ڤیدیۆیەکی خۆی بڵاوکردووەتەوە، لە بەسرە فەلافل دابەش دەکات، سەموونێکی گەورە پڕ دەکات لە فەلافل و سەموونێکی بچووکیش دەهێنێت و تەنیا یەک فەلافلی تێدەکات، لە ئاماژەیەکدا بۆ ئەوەی بەغدا لە پشکی پارێزگاکان بودجە دەداتە هەرێمی کوردستان.

ئەوەی لەوبارەیەوە دەگوترێت: ڕێناس عەلی، ڕۆژنامەنووسی دیاری عێراقی کە خۆشی شیعەیە لەسەر ڤیدیۆکە دەڵێت: "ئەمە ئەوپەڕی گاڵتەجاڕییە، تۆ یاسادانەری، ئەگەر هەڵەیەک هەیە بڕۆ ڕاستی بکەرەوە، وەکو پیاوی دەوڵەت ڕەفتار بکە نەک ڤلۆگەرەکان ".

زانیاریی زیاتر: "بەبۆنەی ڕەفتارەکانی مستەفا سەنەدەوە مەگەر دەست لەو گەنجانەش بشۆین کە ئومێدمان پێیان هەبوو گۆرانکاری بکەن". ئەو ڕۆژنامەنووسە وا دەڵێت.

وێنە گەورەکە: پشکی پارێزگاکانی عێراق لە خشتەکانی بودجە کەمکراوەتەوە، هەندێک لایەن لە چوارچێوەی هەماهەنگی، سەرۆکوەزیرانی عێراق تۆمەتبار دەکەن بەوەی دەیەوێت دواتر ئەو پارەیە بۆ بانگەشەی هەڵبژاردن بەکاربهێنێت.

ئەوەی پێویستە بیزانیت: مستەفا سەنەد پەرلەمانتاری شیعە، بەوە ناسراوە دژایەتیی هەرێمی کوردستان دەکات و دژی ناردنی مووچەی فەرمانبەرانە، دەڵێت "لەبەر ئەوە هێرش دەکەمە سەر هەرێمی کوردستان بۆ ئەوەی ڕای گشتیی پارێزگاکانی عێراق بجوڵێنم ".