بەدواداچوونێکی ئاڤا لە گوندێكی دهۆک پارە وەرگرتنێکی نایاسایی ڕادەگرێت

ئاڤا نیوز

لە گوندێکی سنووری دهۆک بەبێ ئاگەداری حکومەت پارەی مانگانەی ئاو لە خەڵک وەردەگیرا، بەڵام دوای بەدواداچوونێکی ئاڤا ئەو کارە نایاساییە ڕاگیرا.

چیرۆکی سەرەکی: ماوەی پێنج ساڵ بوو پارەی ئاو لە خەڵکی گوندی "بەرێ بهارێ"ی سنووری ناحیەی زاویتە لە پارێزگای دهۆک وەردەگیرا، بەبێ ئەوەی حکومەت ئەو پارەیە وەربگرێت و ئاگەدار بێت.

چی ڕوویدا: لە ڕێگەی بەڕنامەی "ڕابن ژ خەوێ"ـی ڕادیۆی ئاڤا بەهدینانەوە هاووڵاتیێکی گوندەکە ئاشکرای کرد بەبێ بڕیاری حکومەت پارەی ئاویان لێوەردەگیرێت و ئاڤاش بەدواداچوونی بۆ بابەتەکە کرد.

قووڵتر: ماوەی پێنج ساڵ بوو بەبێ ئاگەداری حکومەت، لەلایەن موختاری گوندەکەوە مانگانە بەناوی خەرجی بیری ئاوەوە، پارە لە خەڵک وەردەگیرا و دەدرایە ئەو کەسانەی لەسەر بیرەکە کاریان دەکرد، ئەمەش بەبێ هیچ پسووڵەیەک دەکرا و هەر ماڵەی پێنج هەزاری لێ وەردەگیرا لەکاتێکدا گوندەکە 300 ماڵی تێدابوو.

لێدوانی فەرمی: ئەندازیار ڤەگێر ئەحمەد، بەڕێوەبەری ئاوی پارێزگای دهۆک بەشداری لە بەرنامەی " ڕابن ژ خەوێ " کرد و گوتی: دوای ئاگاداربوون لە بابەتەکە لە ڕێگەی ئاڤاوە بەدەواداچوونمان کرد و کۆتایمان بەو کارە نایاساییە هێنا.