لە سێ ناحیەی هەرێمی کوردستان سەرژمێریی ئەزموونی دەکرێت

ئاڤا نیوز

 

سەرژمێریی ئەزموونی لە سەرجەم پارێزگاکانی عێراق دەستپێدەکات، لە هەرێمی کوردستانیش لە سێ ناحیە ئەو پڕۆسەیە دەکرێت.

 

وێنە گەورەکە: دوای 27 ساڵ نۆیەمین سەرژمێریی گشتی لە عێراق دەکرێت، سبەی هەینی 31-05-2024 سەرژمێریی ئەزموونی دەستپێدەکات و ماوەی 14 ڕۆژ بەردەوام دەبێت.

 

لێدوانی فەرمی: گۆهدار محەممەد عەلی، بەرپرسی ئامارەکانی دانیشتووان و هێزی کار لە دەستەی ئاماری هەرێمی کوردستان بە ئاڤا نیوزی گوت، "ناحیەی بەحرکە لە هەولێر، ناحیەی بەکرەجۆ لە سلێمانی و ناحیەی سێمێل لە دهۆک تەرخانکراون بۆ سەرژمێری ئەزموونی".

 

زانیاریی زیاتر: لە هەر پارێزگایەک 40 لێکۆڵەر، کارمەندی هونەری و کارگێڕی ڕاهێنراون بۆ پڕۆسەی سەرژمێری لە هەرێمی کوردستان، بەگوێرەی پێویستی ئەرکەکانیان بەسەر دابەش دەکرێت.

 

ئەمەش بزانە: بەگوێرەی دوایین ئامار ساڵی 2023 ژمارەی دانیشتووانی هەرێمی کوردستان بووە بە  شەش ملیۆن و 556 هەزار و 752 کەس.