ژمارەیەک هاونیشتیمانی هەرێمی كوردستان لە سعوودیە دەستگیردەكرێن

ئاڤا نیوز 

 

بەهۆی نەهاتنەوەی ناویان لە تیروپشکی وەزارەتی ئەوقاف و کاروباری ئایینی بۆ ئەنجامدانی فەریزەی حەج، ژمارەیەک هاونیشتیمانی کوردستان بۆ ئەنجامدانی ئەو فەریزەیە پەنایان بردووەتە بەر ڕێگای قاچاغ . 

 

وێنە گەورەکە: ماوەی چەند ڕۆژێکە پۆلیسی سعوودیە پڕۆسەی دەستگیرکردنی ئەو کەسانەی دەستپێکردووە کە بەبێ وەرگرتنی ڤیزای حەج هەوڵدەدەن فەریزەی حەج بەجێبگەیێنن، بەشێکیان هاونیشتیمانی هەرێمی کوردستانن.

 

لێدوانە فەرمییەکان: کاروان ستوونی، گوتەبێژی بەڕێوەبەرایەتی حەج و عومرەی کوردستان  بە ئاڤا نیوزی گوت: ماڵباتی بەشێک لەو کەسانەی بە ڤیزای ساڵی سەردانی سعوودیەیان کردووە پەیوەندی بە ئێمە دەکەن، بۆ ئەوەی ڕێگەچارەیەکیان  پێبڵێین تاوکو فەریزەی حەج ئەنجام بدەن، بەڵام هیچ چارەسەرێک نییە و ناتوانن بە ڤیزای ساڵی حەج بکەن.

 

حاجی سەروەر شێرزاد، خاوەنی کۆمپانیای "زووار مەککە" بە ئاڤا نیوزی گوت: لە دوێنێ وە زیاتر لە 700 کەس بەهۆی نەبوونی ڤیزای حەجەوە دەستگیرکراون بەشێکی زۆریان کوردن، دوای ئەوەی لە مەککەوە بۆ مەدینە دەگوازرێنەوە، دووبارە دەگەڕێنەوە بۆ مەککە و بە قاچاغ حەج دەکەن.

 

باکگراوند: بۆ ئەمساڵ چوار هەزار و 685 هاووڵاتی هەرێمی کوردستان فەریزەی حەج ئەنجام دەدەن، لە 27ی ئەم مانگە یەکەمین کاروان بە فڕۆکە بەڕێکەوتن و تا 05 - 06 - 2024 تەواوی حاجیانی هەرێم دەگەنە سعوودیە.