وەزارەتی دارایی سێیەمین لیستی مووچەخۆرانی هەرێمی کوردستانی ئاراستەی TBI کرد

ئاڤا نیوز

 

وەزارەتی دارایی و ئابووریی هەرێمی کوردستان ڕایگەیاند لیستی ناوی 2557 مووچەخۆر ئاراستەی TBI کراوە، ئەمەش سێیەم لیستە لەلایەن وەزارەتەکەوە ئاڕاستەی بانکی بازرگانیی عێراق دەکرێت.

 

وێنە گەورەکە: سێیەم لیستی مووچەخۆران لە چوارچێوەی پڕۆژەی هەژماری من و بە پشتبەستن بە ڕێککەوتنی وەزارەتی دارایی و ئابووری لەگەڵ بانکی عێراقی بۆ بازرگانی (TBI) بۆ بەغدا دەنێردرێن.

 

ڕاگەیێنراوی فەرمی: وەزارەتی دارایی و ئابووریی هەرێمی کوردستان ڕایگەیاند: ڕۆژی پێنجشەمە 30-05-2024، سێیەمین لیستی فەرمانبەران کە لە زانیاریی دوو هەزار و 557 فەرمانبەری سەرجەم وەزارەتەکانی هەرێمی کوردستان پێکهاتوون، ئاراستەی بانکی عێراقی بۆ بازرگانی (TBI) کرا.

 

ئەوەی پێویستە بیزانیت: حکومەتی هەرێمی کوردستان ئاسانکاریی تەواوی کردووە تاوەکو مووچەخۆران لە بانکە تۆمارکراوەکانی بانکی ناوەندیی عێراق مووچە وەربگرن، بۆ ئەوەی هیچ بیانوویەک بۆ وەزارەتی دارایی عێراق نەمێنێتەوە بۆ ناردنی مووچە.

 

گۆشەیەكی دیكە: تا ئێستا 400 هەزار مووچەخۆر لە پرۆژەی هەژماری من بەشدارن و خۆیان تۆمار کردووە.