عێراق هەشت ئەندامی دیکەی "داعش" لە سێدارە دەدات

ئاڤا نیوز  

سەرەڕای هۆشدارییەکانی ڕێکخراوی لێبووردنی نێودەوڵەتی لەبارەی "بە هەڕەمەکی لەسێدارەدان لە عێراق" و "نەبوونی دادپەروەری"، پڕۆسەی لەسێدارەدان لەناو زیندانەکانی عێراق بەردەوامە.

 
لێدوانی فەرمی: سەرچاوەیەکی ئەمنیی بە ئاژانسی فرانس پرێسی گوت: بە تاوانی تیرۆر سزای لە سێدارەدان بەسەر هەشت زیندانیکراو لە زیندانی حووت لە شاری ناسریە ناوەندی پارێزگای زیقار جێبەجێکراوە و سەرجەمیشیان عێراقی بوونەو تۆمەتباربوونە بە ئەندامبوون لە ڕیزەکانی "ڕێکخراوی تیرۆریستی داعش".

زانیاریی زیاتر: سەرچاوەیەکی پزیشکی لە پارێزگاکە بۆ ئاژانسەکە ئەوەی پشتڕاستکردووەتەوە، تەرمی ئەو هەشت کەسەیان وەرگرتووە.

وێنە گەورەكە: لە ماوەی مانگەکانی چوار و پێنجی ئەمساڵ ئەمە سێیەمین لە سێدارەدانی بە کۆمەڵە لە عێراق جێبەجێ دەکرێت، پێشتریش سەرچاوە ئەمنییەکان بۆ میدیاکان لەسێدارەدانی 13 کەسیان لە 25ـی کانوونی دووەمی 2023 پشتڕاست کردبووەوە کە ئەمە یەکەم لەسێدارەدانی بەکۆمەڵ بوو لە دوای ساڵی 2020ـەوە.