دروستکردنی چوار بەنداوی نوێ دەچێتە قۆناغی جێبەجێ کردن

ئاڤا نیوز

ڕێکارە کردارییەکانی دروستکردنی چوار بەنداو لە هەرێمی کوردستان دەستیپێکراوە، دەستەی باڵای ڕاوێژکاریش دوایین پێداچوونەوە بە پڕۆژەکان دەکات.

وێنە گەورەکە: هەرێمی کوردستان و عێراق هەنگاوەکانیان بۆ ڕووبەڕووبوونەوەی ئاڵنگارییەکانی ئاو و هەوا چڕکردووەتەوە، یەكێک لە ڕێگەکانیش دروستکردنی پۆند و بەنداوە، بۆ گلدانەوەی ئاو و بەهێزکردنی سامانی کشتوکاڵی.

لێدوانی فەرمی: ڕەحمان خانی، بەڕێوەبەری گشتیی بەنداوەکانی هەرێمی کوردستان بە ئاڤا نیوزی گوت، "لیژنەیەک لە بەڕێوەبەرایەتی گشتیی بەنداوەکانی وەزارەتی کشتوکاڵی هەرێمی کوردستان  و  سەرچاوەکانی ئاوی عێراق، تەواوی دەرخستەکەیان ئامادەکردووە و دراونەتە دەستەی باڵای ڕاوێژکاری، دوای ئەوە دەخرێتە بەردەم سەرۆکوەزیرانی عێراق و پەسەند دەکرێت."

 

ئەوەی پێویستە بیزانیت: ئەو چوار بەنداوە پێکهاتوون لە بەنداوەکانی تەقتەق و مەنداوە لە سنووری پارێزگای هەولێر، باکرمان لە دهۆک  و دەڵگە لە سلێمانی، دوای تەواو بوونیان زیاتر لە چوار ملیار مەتر سێجا ئاو گل دەدەنەوە.