"بەشێک لەو کەسانەی هێرشیان کردە سەر خواردنگە ئەمریکییەکان سەر بە هێزە ئەمنییەکانن"

ئاڤا نیوز

 وەزارەتی ناوخۆی عێراق ڕایگەیاند، هەندێک لەو کەسانەی کە هێرشدەکەنە سەر خواردنگە بیانییەکان، سەر بە دەزگایەکی ئەمنیی عێراقن.

وێنە گەورەکە: ماوەیەکە لە شارە جیاوازەکانی عێراق بەتایبەتی لە بەغدا هێرش دەکرێتە سەر چەند خواردنگەی بیانی، حکومەتی عێراقیش چەند کەسێکی دەستگیر کردووە و دەڵێت "بەشێک لەو کەسانەی دەستگیر کراون، سەر بە  دەزگایەکی ئەمنیی عێراقن".

ڕاگەیێنراوی فەرمی: وەزاتی ناوخۆی عێراق ڕایگەیاند:"دوای هێرشەکان دەستبەجێ لیژنەیەک پێک هێنرا بۆ لێکۆڵینەوە لەو ڕووداوە و ژمارەیەک کەس دەستگیر کران و لە لێکۆڵینەوەدا ددانیان بەوەدا ناوە کە دەزگایەکی ئەمنیی ڕایسپاردوون بۆ ئەو کارە".

زانیاریی زیاتر: "ئەو کەسانەی ئەو کارەیان کردووە، بەشێکیان سەر بەدەزگایەکی ئەمنین و بۆ زیانگەیاندن بە بەرژەوەندییەکانی ئەمریکا ئەم کارەیان کردووە". وەزارەتی ناوخۆی عێراق وای گوتووە.

ئەوەی پێویستە بیزانیت: بەشێک لە گرووپەکانی تیلیگرام کە سەر بە گرووپە چەکدارەکانی عێراقن، هانی هێرشکردنە سەر ئەو خواردنگانە دەدەن.

ئەوەی لەوبارەیەوە دەگوترێت: بەشێک لە چالاکوانان و میدیاکانی عێراق پەنجەی تۆمەت بۆ "گرووپی "ڕەبعەڵا" کە سەر بە حیزبوڵای عێراقن ڕادەکێشن.