ئەو وێنەگرەی کۆمەڵکوژی ئێزدییەکانی تۆمار کرد لەسێدارە دەدرێت

ئاڤا نیوز

 

دادگەی کەرخ سزای لە سێدارەدانی بۆ چەکدارێکی "داعش" دەرکرد کە وێنەگری کۆمەڵکوژی ئێزدییەکان بووە.

 

وێنە گەورەکە: بەشێک لەو کۆمەڵکوژییانەی "داعش" بۆسەر هاونیشتمانییانی شەنگال ئەنجامیدەدا، بە ڤیدیۆ و وێنە تۆماردەکران، لە ماڵپەڕ و پلاتفۆرمەکانی سۆشیاڵ میدیای ئەو ڕێکخراوە بڵاو دەکرانەوە.

 

لێدوانی فەرمی: بەگوێرەی ڕاگەیێنراوی دادگەی تاوانەکانی کەرخ لە بەغدا، ئەمڕۆ سێشەممە، سزای لە سێدارەدانیان بۆ چەکدارێكی داعش دەرکردووە، جگە لەوەی تاوانی کۆمەڵکوژی ئەنجامداوە، ڤیدیۆی کاتی کۆمەڵکوژی هاونیشتمانییانی ئێزدی تۆمارکردووە و لە سۆشیاڵ میدیا و ماڵپەڕی "داعش" بڵاویکردووەتەوە.

 

زانیاریی زیاتر: دادگە بەپێی ماددەی (یەک، سێ و چوار)ـی یاسای ژمارە 13ـی ساڵی 2005ـی ڕووبەڕووبونەوەی تیرۆر، پشتبەستوو بە مادەی حەوتی یاسای ژمارەی هەشتی ساڵی 2021ـی (یاسای ڕزگاربووانی ژنانی ئێزدی) سزای لەسێدارەدانی بۆ ئەو چەکدارە دەرکردووە.

 

باکگراوند: ڕۆژی 3-8-2014 چەکدارانی ڕێکخراوی داعش پەلاماری قەزای شەنگال و گوندەکانی دەورووبەریان دا، بەهەزاران هاونیشتمانی ئەو قەزایە ئاوارە بوون و بە هەزارانی دیکەش کەوتنە دەست داعش و کۆمەڵکوژکران.