ئەو کەسانەی لە بەغدا هێرشیان کردە سەر کۆمپانیای کانون ئۆتۆمبێلی هێزە ئەمنییەکانیان لابووە

ئاڤا نیوز

 

فەرماندەی ئۆپەراسیۆنەکانی بەغدا ڕایگەیاند، ژمارەیەک لەو هێرشبەرانەیان دەستگیر کردووە کە هێرشیان کردووەتە سەر کۆمپانیای کانون بۆ بەرهەمە شیرەمەنییەکان و بە ئۆتۆمبێلی هێزە ئەمنییەکان کردەکەیان کردووە.

 

وێنە گەورەکە: چەند ڕۆژێکە لە بەغدا هێرش دەکرێتە سەر کۆمپانیا و خواردنگە ئەمریکییەکان، ئەمەش وەک کاردانەوە بەرامبەر پێدانی چەک بە ئیسرائیل لەلایەن ئەمریکاوە.

 

لێدوانی فەرمی: فەرماندەی ئۆپەراسیۆنەکانی بەغدا ئاماژە بەوە دەکات، ئەمڕۆ سێشەممە چەند تۆمەتبارێک لە ناوچەی (عویریج)ـی باشووری بەغدا هێرشیان کردووەتە سەر کۆمپانیای کانون بۆ بەرهەمە شیرەمەنییەکان، بەڵام هێزە ئەمنییەکان بەشێکیانی دەستگیرکردووە کە کارەکەیان کردووە؛ لە کاتی دەستگیرکردنیان ئۆتۆمبێلێکی جۆری نیسان پاتڕۆڵی هێزە ئەمنییەکانیان لابووە و دەستی بەسەردا گیراوە.

 

باکگراوند: نزیکەی دوو هەفتەیە لە بەغدا هێرش دەکرێتە سەر ئەو خواردنگە و شوێنانەی براندی ئەمریکین، هەر ئەمڕۆ سێشەممە، وەزارەتی ناوخۆ دەستگیرکردنی بەشێک لەو کەسانەی ڕاگەیاند کە هێرشیان کردووەتە سەر خواردنگەی KFC و پەیمانگەی کامبریج و چەند شوێنێکی دیکە لە بەغدا.