لە هەرێمی کوردستان گازی بەفیڕۆچوو  وەک سەرچاوەی وزە بەکاردەهێنرێتەوە

ئاڤا نیوز

 

سەرۆکی دەستەی ژینگەی هەرێمی کوردستان ئاماژە بەوەدەدات، سەرۆکوەزیران بارزانی فەرمانگەی گۆڕانی کەشوهەوای کردووەتەوە و تیمێکی تایبەت کار لەسەر گۆڕانکارییەکان دەکەن.

 

وێنە گەورەکە: لە کابینەی نۆیەمی حکومەتی هەرێمی کوردستان، بە دروشمی (ژینگە گەورەترین سەرمایەی هەرێمی کوردستانە) کاری ڕژد بۆ پاراستن و گەشەپێدانی ژینگەیی کراوە، گرنگترینیان سوودوەرگرتنەوەیە لە گازی بەفیڕۆچوو.

 

لێدوانی فەرمی: عەبدولڕەحمان سدیق، سەرۆکی دەستەی ژینگەی هەرێمی کوردستان بە ئاڤا نیوزی گوت: "گازی هاوەڵ لە کاتی دەرهێنانی نەوت دەردەچێت، لە عێراق و وڵاتانی دیکە ئەم گازە بەفیڕۆدەچێ، بەڵام بە هەوڵی سەرۆکوەزیران بارزانی لەڕێگەی هێنانی کۆمپانیای پەیوەست لە هەرێمی کوردستان بەشێکی لە ژێر زەوی کۆگا دەکرێت و بەشێکی دیکە کارەبای لێ بەرهەم دەهێنرێت".

 

خاڵە ستراتیژییەکان: لە کابینەی نۆیەم بە بڕیاری سەرۆکوەزیران بارزانی کار لەسەر فرەچەشنکردنی سەرچاوەی وزە کراوە، جگە لە نەوت و غاز پشت بە ئاو  و خۆریش بەستراوە و ژمارەیەک کۆمپانیای چینی لەو بوارە کار دەکەن، وەزارەتی کارەبا بەشێک دەکاتەوە بە ناوی بەشی وزە نوێبووەکان.