عێراق بەنیازە هاوشێوەی موجاهیدینی خەلق چارەسەری کێشەی پەکەکە بکات

 ئاڤا نیوز

 

جێگری وەزیری دەرەوەی عێراق ڕایگەیاند، بوونی پەکەکە لە عێراق نایاساییە، حکومەتی عێراق پێیوایە، کێشەی پەکەکە بەگرتنەبەری ڕێوشوێنی تاک لایەنە چارەسەر ناکرێت.

 

لێدوانی فەرمی: هیشام عەلەوی، جێگری وەزیری دەرەوەی عێراق ڕایگەیاند: پرسی پەکەکە پرسێکی ئاڵۆزە، چالاکییەکانیشیان لە عێراق یاسایی نین و قبوڵکراویش نین، چارەسەرکردنی کێشەی پەکەکە نەک بۆ ئاسایشی نەتەوەیی عێراق و تورکیا، بەڵکو بۆ پڕۆژەی ڕێگەی گەشەپێدانیش گرنگە.

 

زانیاریی زیاتر: بەغدا لەگەڵ تاران و نەتەوەیەکگرتووەکان کاری کرد بۆ دەرکردنی ئەندامانی موجاهیدینی خەلق لە عێراق، دواتر بەهۆی مامەڵەی حکومەتی عێراقەوە ئەندامانی موجاهیدین ناچاربوون بڕۆن بۆ وڵاتانی ئەوروپا.

 

گۆشەیەکی دیکەی دیمەنەکە: عەلەوی ئاماژەی بەوەش کردووە، ئێران و عێراق پێکەوە کاریان کرد بۆ داماڵینی حزبەکانی ڕۆژهەڵاتی کوردستان لە چەک لە هەرێمی کوردستان، چەککردنی حزبەکانی ڕۆژهەڵات بەراورد بە پەکەکە ئاسانتر بووە.