بەرپرسێکی وەزارەتی خوێندنی باڵای عێراق: سیاسەتمەداران بڕوانامەی باڵا لە وڵاتەکەمان بێبەها دەکەن

ئاڤا نیوز 

 

بەرپرسێک لە وەزارەتی خوێندنی باڵای عێراق ئاشکرای دەکات، لە ماوەی چوار ساڵی ڕابردوودا سەدان سیاسەتمەدار و دادوەر و ڕاگەیاندنکار بڕوانامەی دکتۆرایان بەدەستهێناوە، زۆرینەشیان لە دوورەوە تێزی دکتۆراکەیان پێشکەش کردووە.

 

وێنە گەورەکە: لە ماوەی چوار ساڵی ڕابردوودا زیاتر لە 500 سیاسەتمەدار و بەرپرسی حکومی و تەنانەت دادوەر و ڕاوێژکار و بەشێک لە کەسایەتییە ناودارەکانی میدیای ناوخۆیی بڕوانامەی دکتۆرایان لە بەیروت و تاران بەدەستهێناوە، زۆرینەیان لە دوورەوە تێزی دکتۆراکەیان پێشکەش کردووە. 

 

هۆکارە زانراوەکان: بەرپرسێکی وەزارەتی خوێندنی باڵای عێراق بۆ ڕۆژنامەی عەرەبی جەدید ڕایگەیاند "سیاسەتمەدارانی عێراق لە ماوەی ساڵانی ڕابردوودا گرنگییان بە بڕوانامەی باڵا و نازناوی ئەکادیمی داوە، بەو پێیەی بەشێکن لە شکۆمەندی سیاسی و کۆمەڵایەتی، جگە لە شایستەی بەدەستهێنانی پۆستی گرنگ لە وڵاتەکەدا".

 

زانیاریی زیاتر: بەگوتەی بەرپرسەکەی وەزارەتی خوێندنی باڵا "بەبێ هەوڵدان نازناوی ئەکادیمی لە زانکۆکانی ئێران و لوبنان دەستدەکەوێت، بە بڕە پارەیەک کە لە 10 هەزار دۆلار زیاتر نەبێت".

 

کاریگەریی و لێکەوتەکان: محەممەد علویە، سەرۆکی سەنتەری عەشتاری عێراقی بۆ توێژینەوەی دیموکراسی، پێیوایە: "دیاردەی بەدەستهێنانی بڕوانامەی باڵا بە ستانداردی نزم لەلایەن هەندێک لەو کەسایەتییە سیاسییانە لە بەرامبەر بڕێک پارە، بووەتە هۆی لەدەستدانی بەهای بڕوانامەی خوێندنی باڵا".