کۆبوونەوەی سێ قۆڵی لەبارەی هەناردەکردنەوەی نەوتی هەرێمی کوردستان بەڕێوەدەچێت

ئاڤا نیوز 

شاندێکی حکومەتی هەرێمی کوردستان و کۆمپانیا نەوتییەکان لە بەغدا، لەگەڵ وەزارەتی نەوتی عێراق لەسەر چارەسەرکردنی پرسی هەناردەکردنی نەوتی هەرێمی کوردستان گفتوگۆ دەکەن.

وێنە گەورەکە: شاندێکی حکومەتی هەرێمی کوردستان و کۆمپانیا نەوتییەکان لە بەغدان، بۆ گفتوگۆکردن لەگەڵ وەزارەتی نەوتی عێراق لەبارەی دیاریکردنی میکانیزمی چارەسەر بۆ هەناردەکردنەوەی نەوتی هەرێمی کوردستان بۆ دەرەوە.

لێدوانی فەرمی: سەباح سوبحی، ئەندامی لیژنەی نەوت وغاز لە پەرلەمانی عێراق بە ئاڤا نیوزی ڕاگەیاند:"گرێبەستی کۆمپانیاکانی بەرهەمهێنەری نەوت هاوبەشییە لەگەڵ حکومەتی هەرێمی کوردستان و لە گفتوکۆکان لەگەڵ لایەنی عێراقی لەسەر ئەوەی 47 بۆ 50٪ی داهاتەکانی نەوت بۆ کۆمپانیاکان، و 30 بۆ 35٪ داهاتیش بۆ حکومەتی هەرێمی کوردستان بێت ئەنجامدەدەن".

زانیاریی بەدەستهاتوو: لە کۆبوونەوەکەدا پرسەکانی نێوان هەردوو حکومەتی هەرێم و حکومەتی عێراق  و وەزارەتی سامانە سروشتییەکان و وەزارەتی نەوتی عێراق و خەرجی کۆمپانیا نەوتییەکان و پرسی پرۆسەی هەناردەکردنەوەی نەوتی هەرێم و تێچووی کۆمپانیا نەوتییەکان  و میکانیزمی ڕێگەچارەسەر بۆ ئەو پرسە تاووتوێ کران .

ئەوەی پێویسیە بیزانیت: لە مانگی ئاداری ساڵی ڕابردووەوە هەناردەی نەوتی هەرێمی کوردستان، لەڕێگەی بەندەری جەیهانی تورکیا وەستاوە، بەو هۆیەوە 16 ملیار دۆلار زیانی لە ئابووریی عێراق داوە.