لە عێراق نزیکەی 14 هەزار سکاڵای توندوتیژیی خێزانی تۆمار دەکرێن

ئاڤا نیوز

 

تەنها لەماوەی پێنج مانگی ئەمساڵ، لە عێراق سەرووی 13 هەزار سکاڵای توندوتیژیی خێزانی تۆمار کراون، هەرێمی کوردستان بەشێك نییە لەو ڕێژەیە.

 

ڕاگەیێنراوی فەرمی:  میقداد میری، گوتەبێژی وەزارەتی ناوخۆی عێراق ڕایگەیاند: "لە پێنج مانگی سەرەتای ئەمساڵدا، 13 هەزار و 857 سکاڵای پێوەندیدار بە توندوتیژیی خێزانی تۆمار کراون".

 

زانیاریی زیاتر: ئەو گوتەبێژە ئاماژەی بەوەش کردووە، لە ماوەی پێنج ساڵی ڕابردوودا، ئەو سکاڵایانەی تۆمار کراون، 27%ـیان ئەوانەن کە توندوتیژی بەرامبەر بە پیاوان کراوە".

 

لەلایەکی دیکە: کازم هادی، توێژەر و چالاکوانی مەدەنی بە ئاڤا نیوزی ڕاگەیاند: "حکومەت ناتوانێت یاسا پەیڕەو بکات، ئەمەش هۆکاری زۆربوونی توندوتیژیی خێزانییە".

 

ئەوەی پێویستە بیزانیت: ئەنجوومەنی باڵای دادوەریی عێراق ئەوەی ئاشکرا کردووە، لە مانگەکانی نیسان و ئاداری ئەمساڵدا، 45 هەزار و 939 گرێبەستی هاوسەرگیری ئەنجام دراون، لەو ژمارەیەش 11 هەزار و 759ـیان جیابوونەتەوە.