داوا دەکرێت بە مەرج ڕێگە بە چوونی خەڵکی پارێزگاکانی هەرێمی کوردستان بۆ نەینەوا بدرێت

ئاڤا نیوز

 

ئەندامێکی ئەنجوومەنی پارێزگای نەینەوا داوا دەکات مامەڵەی هاوشێوە لەگەڵ خەڵکی شارەکانی هەرێمی کوردستان بکرێت و لە کاتی سەردانیان بۆ پارێزگاکە، کارتی نیشینگەیان بۆ دەربکرێت.

 

نووسرای فەرمی: بەپێی نووسراوێک کە وێنەیەکی دەست ئاڤا نیوز کەوتووە، مەروان محەممەد تائی، ئەندامی ئەنجوومەنی پارێزگای نەینەوا لە نووسراوێکدا کە ئاراستەی سەرۆکایەتیی ئەنجوومەنی پارێزگاکەی کردووە، داوا دەکات مامەڵەی هاوشێوە لەگەڵ خەڵکی پارێزگاکانی هەرێمی کوردستان بکرێت کاتێک کە سەردانی پارێزگاکە دەکەن.

 

زانیاریی زیاتر: وەک لە نووسراوەکەدا داواکراوە ئەو بڕگەیە: "لە کاتی چوونیان بۆ نێو پارێزگای نەینەوا، مافی مانەوە بەسەر خەڵکی پارێزگاکانی هەرێمی کوردستان بسەپێنرێت". بخرێتە کارنامەی کۆبوونەوەی ئەنجوومەنی پارێزگاو دەنگی لەسەر بدرێت و ئیدارەی خۆجێی پێیەوە پابەند بێت، ئەمەش لەسەر بنەمای "مامەڵەی هاوشێوە".

 

هۆکارە زانراوەکان: وەک لە نووسراوەکە ئاماژەی بۆ کراوە، ئەو داواکارییەی ئەوان "دوای زۆریی داواکاریی ئەندامانی ئەنجوومەنی پارێزگای نەینەوا و خەڵکی ڕۆشنبیری پارێزگاکە بووە".

 

ئەوەی پێویستە بیزانیت: بەپێی ڕێنمایی پێدانی ڤیزەی ئەلیکترۆنی و نیشنگە لە هەرێمی کوردستان ژمارە 1ی ساڵی 2021، کارتی نیشینگە: ئەو کارتەیە کە ماوەکەی لە شەش مانگ کەمتر نییەو لە سێ ساڵ زیاتر نییە، کە بە کەسانی بیانی دەدرێت و مافی مانەوەی لە هەرێمی کوردستان دەبێت.