ڤیان سەبری لەبارەی مووچە: پێویست ناکات هەموو مانگێک کۆد و ناو بنێرین

ئاڤا نیوز

 

سەرۆکی فراکسیۆنی پارتی لە پەرلەمانی عێراق لەبارەی کێشەی مووچەی هێزە ئەمنییەکانەوە ڕایدەگەیێنێت، هەماهەنگییەکی باش هەیە، بەڵام  وردبینیی لیستەکان کاتی پێویستە بۆیە ناردنی پارە دواکەوتووە.

 

وێنە گەورەکە: تاوەکو ئێستا حکومەتی عێراق مووچەی مانگی ئایاری هێزە ئەمنییەکانی هەرێمی کوردستانی نەناردووە و پێشبینی دەکرێت پێش جەژن بنێردرێت.

 

لێدوانی فەرمی: ڤیان سەبری، سەرۆکی فراکسیۆنی پارتی لە پەرلەمانی عێراق بە ئاڤا نیوزی ڕاگەیاند، "پێویست ناکات وەزارەتی دارایی عێراق  هەموو جارێ  بۆ وردبینی داوای کۆد و ناو بکات، ئاخر کەی کۆد و ناوی هەموو هێزە ئەمنییەکانی عێراق لەلایەن ئەو وەزارەتەوە وەرگیراوە".

 

زانیاریی زیاتر: سەرۆکی فراکسیۆنی پارتی ئاماژە بەوە دەدات، "داواکارین ئەم کێشەیە نەمێنێت و پێویستیشە کۆتایی بە وردبینی ناو و کۆد بهێنرێت".

 

لەلایەکی دیکەوە: لەبارەی پرسی هەڵبژاردنی سەرۆکی پەرلەمانی عێراق، ڤیان سەبری بابەتەکە بە ئاڵۆز ناو دەبات و دەڵێت، پێشتر سوننەکان دوو ماڵ بوون ئێستا بوونەتە سێ ماڵ و دەبێت لایەنە سوننەکان خۆیان ڕێکبخەنەوە.