هاوپەیمانی نەسر: هیچ ڕێککەوتنێک نییە بۆ هەڵبژاردنی پێشوەخت

ئاڤا نیوز  

هاوپەیمانی نەسر کە یەکێکە لە لایەنە سەرەکییەکانی نێو چوارچێوەی هەماهەنگی، ڕەتیدەکاتەوە ڕێککەوتنێکی نیشتیمانیی هەبێت بۆ هەڵبژاردنی پێشوەختە لە عێراق و پێیوایە کاری لە پێشینەتر هەن گرنگتر لە هەڵبژاردنی پێشوەختە.

ئەوەی پێویستە بیزانیت: چوارشەممە نووری مالیکی، سەرۆکی هاوپەیمانیی دەوڵەتی یاسا ڕایگەیاند: لەگەڵ هەڵبژاردنی پێشوەختەن پێش کۆتاییهاتنی ساڵی 2024 و ئاماژەی بەوەش کرد لەگەڵ فرە بازنەیین، بەڵام نەک بەو شێوەیەی ئێستا هەیە.

ڕاگەیێنراوی فەرمی: هاوپەیمانی نەسر، بە سەرۆکایەتی حەیدەر عەبادی ڕایگەیاند: "نەسر وایدەبینێت کاری لە پێشینەتری نیشتیمانی هەن کە گرنگترن لە هەڵبژاردنی پێشوەختەی پەرلەمان" و هاوکات جەخت لەوە دەکاتەوە "هیچ ڕێککەوتنێکی نیشتیمانی نییە بۆ ئەنجامدانی هەڵبژاردنی پێشوەختە".

زانیاریی زیاتر: بە بڕوای هاوپەیمانییەکە، کاری گرنگتر هەن پێویستیمان بە کارکردنە، هاوکات پابەندبوون بە کاتە دەستوورییەکان بۆ هەڵبژاردنی سەرۆکی پەرلەمان.

وێنە گەورەكە: لە چوارچێوەی کارنامەی سەرۆکوەزیران، محەممەد شیاع سوودانی بۆ پێکهێنانی حکومەت، هەڵبژاردنی پێشوەختە یەکێکە لە خاڵەکان و جەختیش لەوە کراوەتەوە دوای شەش مانگ لە پێکهێنانی حکومەت دەبێت ئەنجامی بدات.