حەماس لە بەغدا نووسینگە دەکاتەوە

ئاڤا نیوز

بزووتنەوەی مقاوەمەی ئیسلامی فەڵەستینی "حەماس" مەبەستیەتی نووسینگەیەک لە بەغدای پایتەختی عێراق بکاتەوە، بۆ ئەو مەبەستەش ڕەزامەندیی فەرمیی وەرگرتووە.

وێنە گەورەکە: پێشتر قەتەر وەک گوشارێک هەڕەشەی ئەوەی لە بەرپرسانی حەماس کردبوو، ئەگەر بێت و پڕۆژەی ئاگربەست لەگەڵ ئیسرائیل پەسەند نەکەن ئەوا لەو وڵاتە دەریان دەکات.

زانیاریی بەدەستهاتوو: سەرچاوەیەکی ئاگادار ئەوەی بە میدیای عێراق ڕاگەیاندووە، بە ڕەزامەندیی فەرمی حکومەتی عێراق لەماوەی دوو ڕۆژی داهاتوودا بزووتنەوەی حەماس نووسینگەی پەیوەندی و ڕاگەیاندن لە بەغدای پایتەخت دەکاتەوە.

زانیاریی زیاتر: ئەو سەرچاوەیە ئەو هەواڵانەشی ڕەتکردەوە کە باس لە کردنەوەی سەربازگەیەکی حەماس لە جەرگەی بەغدای پایتەخت دەکرێت و دەڵێت " ئەم هەواڵانە دوورن لە ڕاستییەوە، بابەتەکە تەنیا لە فەرمانگەی پەیوەندییەکان و ڕاگەیاندن خۆی دەبینێتەوە".

ئەوەی پێویستە بیزانیت: پرسی کردنەوەی نووسینگەی حەماس، دوای پەیوەندییە ئاڵۆزەکانی نێوان قەتەر و سەرکردەکانی حەماس دێت، کە نیشتەجێی دەوحەن و سەرکردایەتی زنجیرەیەک دانوستان لەگەڵ چەند لایەنێک دەکەن بۆ کۆتایی هێنان بە شەڕی غەززە.