عێراق "مەترسیدارترین وڵاتە" بۆ ڕۆژنامەنووسان

ئاڤا نیوز 

 

دۆخی ئازادیی ڕۆژنامەگەری لە عێراق تا دێت خراپتر دەبێت و بەرپرسێک لە ڕوانگەی عێراقی بۆ ئازادیی ڕۆژنامەگەری دەڵێت "عێراق  لەڕووی کاری ڕۆژنامەنووسی بە مەترسیدارین وڵات دادەنرێت".

 

وێنە گەورەکە: ڕۆژی 15-6-2024 یادی 155 ساڵەی ڕۆژنامەگەری عێراقە بە بۆنەی ده‌رچوونی ڕۆژنامەی زەورا لە ساڵی 1869 وەک یەکەم ڕۆژنامەی عێراقی.

 

ئەوەی پێویستە بیزانیت: خراپتربوونی دۆخی ئازادیی ڕۆژنامەگەری و کاری ڕۆژنامەوانی لە عێراق لەکاتێکدایە، کاری ڕۆژنامەوانی و ئازادی ڕادەربڕین لە هەرێمی کوردستان گەشەیەکی زۆر باشی کردووە.

 

لێدوانی فەمی: فیراس حەمەدانی، بەرپرس لە ڕوانگەی عێراقی بۆ ئازادیی ڕۆژنامەگەری بە ئاڤا نیوزی ڕاگەیاند: "عێراق لەڕووی ئازادی ڕۆژنامەگەرییەوە لە پلەکانی کۆتایی دێت، لەڕووی پێشلکارییشەوە لە ڕیزی پێشەوە دێت، تەنانەت عێراق بە مەترسیدارین وڵات دادەنرێت لەڕووی کاری ڕۆژنامەنووسییەوە".

 

پێشلێکارییەکان لە عێراق بە سەدانن

 

فازڵ غەراوی، بەرپرسی ناوەندی ستراتیژی بۆ مافەکانی مرۆڤ ڕایگەیاند: "لە ماوەی سێ ساڵی ڕابردوودا سەدان پێشێلکاری بەرامبەر ڕۆژنامەنووسان تۆمارکراون، پێشێلکارییەکانش جۆراوجۆر بوون، وەک: دەرکردنی زۆرەملێ، دادگاییکردن، تۆقاندن، ڕێگریکردن لە وێنەگرتن، شکاندنی ئامێرەکان و چەندانی دیکە.

 

زانیاریی زیاتر: عێراق لە ساڵی 2024دا لە کۆی 180 وڵات لەڕووی ئازادی ڕۆژنامەگەرییەوە لە پلەی 169ی جیهانی و 12ی وڵاتانی عەرەبی دێت. بەراورد بە ساڵی ڕابردوو دوو پلە دابەزیووە کە لە ڕیزبەندیی 167ـی جیهاندا بوو.

زۆرترین ڕۆژنامەنووس لە عێراق کوژراون

 

هەر بەپێی ڕاگەیێنراوەکەی ناوەندی ستراتیژی بۆ مافەکانی مرۆڤ: "عێراق لە پلەی یەکەمی جیهانی دێت لە ژمارەی شەهیدانی ڕۆژنامەگەری، کە گەیشتووتە 470 شەهید".

 

دۆخی هەرێمی کوردستان لەڕووی کاری ڕۆژنامەنووسییەوە

 

بەگوتەی نەقیبی سەندیکای ڕۆژنامەنووسان، حکومەتی هەرێمی کوردستان پشتیوانی لە ڕۆژنامەنووسان دەکات و ئازادی ڕۆژنامەوانیش لە باشبووندایە.

 

پێشتر سەندیکای ڕۆژنامەنووسانی کوردستان لە ڕاپۆرتی ساڵانەی خۆیدا لەبارەی دۆخی ڕۆژنامەوانی ڕایگەیاندبوو، حکومەتی هەرێمی کوردستان پشتیوانی لە ڕۆژنامەنووسان دەکات، ئەوە لەکاتێکدایە ئەمریکا سێ جار لە تۆڕی کۆمەڵایەتیی فەیسبووک نووسیویەتی دۆخی ئازادی ڕۆژنامەگەری لە کوردستان باشتر بووە.

 

ئازاد حەمەد ئەمین، نەقیبی سەندیکای ڕۆژنامەنووسانی کوردستان ئەوکات بە ئاڤا نیوزی گوتبوو: "پشتیوانیی حکومەت لە کاری ڕۆژنامەگەری لە چوارچێوەی یاساکان بەردەوامە، لە هەموو ئەو کارانەی کردوومانە پشتیوانمان بووە".