عێراق ده‌یه‌وێت یاسای وەبەرهێنان هاوشێوه‌ی هه‌رێمی كوردستان لێبكات

دلێر حه‌مه‌

 

لیژنەی وەبەرهێنانی پەرلەمانی عێراق، داوا دەکات یاسای وەبەرهێنانی عێراق وەک یاسای وەبەرهێنانی هەرێمی کوردستان بێت.

 

وێنە گەورەکە: بەمەبەستی هاندانی وەبەرهێنه‌رو سەرمایەی بیانی، لیژنەی وەبەرهێنانی پەرلەمانی عێراق داوای هه‌مواركردنه‌وه‌ی چه‌ند برگه‌یه‌كی یاسای وەبەرهێنان ده‌کات. 

 

لێدوانی فەرمی : بەرگەشت ئاکرەیی گوتەبێژی دەستەی وەبەرهێنانی هەرێمی کوردستان بە ئاڤا نیوزی گوت: یاسای وەبەرهێنان لە هەرێمی کوردستان بەجۆرێکە هەموو وەبەرهێنەرێکی بیانی دەتوانێت بێت لەناوخۆی هەرێم وەبەرهێنان بکات و داهاتەکەی بەڕێژەی %100 بباتەوە وڵاتەکەی.

زانیاریی زیاتر: بە گوتەی بەرگەشت ئاكرەیی، ئەو وەبەرهێنەرانە بۆماوەی 10 ساڵ هەموو لێخۆشبوونێکی گومركییان بۆ دەکرێت و بۆ پێنج ساڵ هەر کەلوپەل و کەرەستەیەک بۆ پڕۆژەیەکەیان دەیهێنن لێخۆشبوونیان بۆ دەکرێت.

 

ئەوەی پێویستە بیزانیت: وەبەرهێنەری بیانی لە عێراق بە ڕێژەی ته‌نیا 49% مافی خاوەندارێتی و بەڕێوەبردنی کۆمپانیاکەی هه‌یه‌، ئەمەش کاریگەری نەرێنی دروستكردووه‌ لەسەر هاندانی وەبەرهێنانی بیانی بۆ ڕووكردنە عێراق.