عەممار حەکیم لەبارەی هەڵبژاردنی سەرۆکی پەرلەمان داوایەک لە لایەنە سیاسییەکان دەکات

ئاڤا نیوز 

 

سەرۆکی ڕەوتی حیکمە داوا لە هێز و لایەنە سیاسییەکانی عێراق دەکات پرسی هەڵبژاردنی سەرۆکی پەرلەمانی عێراق بەپێی میکانیزمە دەستوورییەکان و شەراکەتی نیشتمانی یەکلا بکەنەوە.

 

وێنە گەورەكە: زیاتر لە حەوت مانگ بەسەر دوورخستنەوەی محەممەد حەلبووسی لە سەرۆکایەتیی پەرلەمانی عێراق تێدەپەڕێت، سەرەڕای ئەوەی چەندجارێک هەوڵ دراوە سەرۆکێکی نوێ هەڵبژێردرێت، بەڵام بەهۆی ناکۆکیی نێو ماڵی سوننە و دابەشبوونی لایەنەکان، نەتوانراوە ئەو پرسە یەکلا بکرێتەوە.

 

لێدوانی فەرمی: ڕۆژی دووشەممە 17-06-2024 لە میانی پێشکەشکردنی گوتارێک لە نوێژی جەژن لە بەغدا، عەممار حەکیم ڕایگەیاند: ناکرێت ئەو پۆستە ببێتە هۆکارێک بۆ ئەوەی ناکۆکی و ململانێ بکەوێتە نێوان ڕۆڵەکانی پێکهاتەیەک، بە پێچەوانەوە هێزی ئێمە لە یەکبوونی خۆماندایە و یەکگرتوویی بەبێ سازشکردن و بەخشین نایەتە دی.