ئەمشەو ڕۆناڵدۆ بۆ یەکەمجار لە یاریگەی لایپزیگ یاریی دەکات

ئاڤا نیوز

 

ئەمشەو دوو یاریی لە یۆرۆی 2024 بەڕێوەدەچێت، گۆڵکاری مێژوویی پاڵەوانێتییەکەش بەنیازە یەکەم ژووانی لەگەڵ گۆڵ لەسەر یاریگەی  لایپزیگ ببەستێت.

 

وێنە گەورەکە: 17 ـەمین وەشانی یۆرۆ بەبەشداری 24 هەڵبژاردە لە ئەڵمانیا بەڕێوەدەچێت، ئەمشەو بەبەڕێوەچوونی دوو یاریی کۆمەڵەی شەشەم کۆتایی بە گەڕی یەکەمی قۆناغی کۆمەڵەکان دێت.

 

شێوازی جێوازی جێبەجێکردن: کاتژمێر حەوتی ئێوارە لەسەر یاریگەی سیگناڵ ئیدۆنا پارک، هەردوو هەڵبژاردەی تورکیا و جۆرجیا بەیەک دەگەن، کە یەکەم بەیەکگەیشتنی نێوانیانە لە پاڵەوانێتییەکە، پێشووتر لە دوو بۆنەی فەرمیدا ڕووبەڕوو بوونەوە تورکیا یارییەکی بردووەتەوە و لە یارییەکی دیکەشدا یەکسانبوون.

 

لەلایەکی دیکەوە: کاتژمێر 10ـی شەو لەسەر یاریگەی لایپزیگ، کریستیانۆ ڕۆناڵدۆ و هاوەڵانی، یەکەم تاقیکردنەوەی شەشەمین پاڵەوانێتی پاشا و گۆڵكاری مێژوویی یۆرۆ بەرامبەر بە چیک دەکەن.

 

زانیاریی زیاتر: پۆرتوگال و چیک 5 جار ڕووبەڕووی یەکتر بوونەتەوە، ڕۆناڵدۆ لە چوار یاریی بەشداری کردووە دوو گۆڵ و دوو ئاسیستی هەیە. ئامارەکانی مێژوو ڕوو لە پۆرتوگێزە و  چوار بردنەوەی بەرامبەر بە چیک تۆمارکردووە و یەک یاریش لە بەرژەوەندی چیکییەکان تەواو بووە.

 

ئەوەی پێویستە بیزانیت: ئاڤا سپۆڕت سەرجەم یارییەکانی ئەم پاڵەوانێتییە ڕووماڵ دەکات. ئەمشەو کاتژمێر 9:30 ئاسام جەباری ستۆدیۆی تایبەت بە شیکردنەوەی یارییەکانی دەبێت و کاتژمێر 12 چێنەر عەبدولقادر لە ئەڵمانیاوە ڕاستەوخۆ شیکردنەوەی یارییەکان دەکات.

 

زانیاریی تایبەت: چێنەر عەبدولقادر، بەڕێوەبەری ئاڤا سپۆرت بۆ ڕووماڵی پاڵەوانێتییەکە لە ئەڵمانیایە و گوتی، "بەهۆی نالەباری کەشوهەوا، ئەمشەو کەمترین هاندەر لە سەرجەم شارەکانی ئەڵمانیا لەبەردەم شاشەکاندا سەیری یارییەکان دەکەن، خۆشم لە نێو ئەو هاندەرانە بینەری یاریی پۆرتوگال و چیک دەبم".