کۆچبەرانی نایاسایی لە بەریتانیا ڕیکۆرد تۆمار دەکەن

ئاڤا نیوز 

حکومەتی بەریتانیا ڕایگەیاند، ئەمڕۆ زیاتر لە 880 کۆچبەری نایاسایی بە بەلەمی بچووکەوە لە نۆکەندی ئینگلیز پەڕیونەتەوە بۆ بەریتانیا، کە زۆرترین ژمارەیە لە یەک ڕۆژدا تا ئێستا تۆمارکرابێت.

بۆچی گرنگە: ئەمە لەکاتێکدایە ڕیشی سووناک، سەرۆکوەزیرانی ئەو وڵاتە بەڵێنی داوە "بەلەمەکان بووەستێنێت" بەڵام ڕووبەڕووی ئاستەنگ بووەتەوە، بەتایبەت بۆ ناردنی پەناخوازان بۆ ڕوواندا.

ژمارەکان وا دەڵێن: بەگوێرەی ئاماری وەزارەتی ناوەخۆی بەریتانیا، لەگەڵ پەڕینەوەی 882 کەس، کۆی گشتی ژمارەی کۆچبەران بۆ ساڵی 2024 دەگاتە 12 هەزار و 313 کۆچبەر.

ئەمەش بزانە: ژمارەی ئەو کۆچبەرانەی سنووریان بڕیوە و گەیشتوونەتە بەریتانیا، لە ماوەی کەمتر لە شەش مانگی ئەمساڵدا بە ڕێژەی 18٪ زیاترە  لە کۆی کۆچبەرانی ساڵی ڕابردوو کە ژمارەیان 10 هەزار و 472 کەس بوو.

بابەتی ستراتیژی: یاسایەکی مشتومڕاوی کە ڕێگە بە دیپۆرتکردنەوەی کۆچبەرانی نایاسایی بۆ ڕوواندا دەدات، دوای چەند مانگێک لە مشتومڕ لە پەرلەمان لە مانگی نیسانی ڕابردوودا پەسەند کرا، بەڵام داهاتووی ئەم پڕۆژەیە نادیارە، لەو کاتەوەی ڕیشی سووناک ڕایگەیاندووە هەڵبژاردنی یاسادانان لە 4ی تەممووز دەکرێت.