کەنەدا سوپای پاسداران وەک ڕێکخراوێکی تیرۆریستی دەناسێنێت

ئاڤا نیوز

حکومەتی کەنەدا دەست بە ڕێککارەکان دەکات بۆ ئەوەی سوپای پاسدارانی ئێران لە چەند ڕۆژی داهاتوودا وەکو ڕێکخراوێکی تیرۆریستی بناسێنێت.

لێدوانی فەرمی: دۆمینیک لیبلانک، وەزیری سەلامەتی گشتیی کەنەدا بە ئاژانسەکانی هەواڵی ڕاگەیاندووە: "ئەم هەنگاوە ڕەنگدانەوەی بەڵگەی زۆر بەهێزە لە دژی ئێران، کەنەدا هەموو  هەوڵێک دەگرێتەبەر بۆ بەرەنگاربوونەوەی چالاکییە تیرۆریستییەکانی سوپای پاسداران".

ئەوەی پێویستە بیزانیت: ئۆپۆزیسیۆنی کەنەدا لەمێژە داوا دەکات سوپای پاسداران بخرێتە لیستی تیرۆرەوە، بەڵام حکومەتی کەنەدا خۆی لەم هەنگاوە بەدوور دەگرت و پێیوابوو "ئەو کارە مەترسیدارە و دەرئەنجامی نەخوازراوی دەبێت". بڕیارەکەS لەسەر بنەمای یاسا و هۆشداریی دەزگا ئەمنییەکان دراوە نەک لە ئەنجامی فشاری سیاسی.

ئەمەش بزانە:  کەنەدا لە ساڵی 2012  ەوە پەیوەندی دیپلۆماسی لەگەڵ تاران پچڕاندووە، ئەمریکاش لە ساڵی 2019 ەوە سوپای پاسدارانی بە ڕێکخراوێکی تیرۆریستی ناساندووە.

بۆچی گرنگە: هەر گرووپ و ڕێکخراوێک بخرێتە لیستی تیرۆرەوە لەگەڵ هەر کەس  و لایەنێک کە پشتیوانی دەکات، هەموو جۆرە پەیوەندیی و مامەڵەیەکی لەگەڵ قەدەغە دەکرێت، دەتوانرێت سەرچاوە  داراییەکانیشی بلۆک بکرێن. دەشێت لێکۆڵینەوەش لەگەڵ بەرپرسانی باڵای پێشووی ئێرانی دانیشتووی کەنەدا بکرێت.