عێراق ڕەتی دەکاتەوە لە جەژندا لەسێدارەدانی بەکۆمەڵ جێبەجێ کرابێت

ئاڤا نیوز

 

وەزارەتی دادی عێراق ڕوونکردنەوەیەک بڵاوکردەکاتەوە و ڕەتی دەکاتەوە لە ڕۆژانی جەژن هیچ کەسێکی لە سێدارە دابێت.

 

چیرۆکی سەرەکی: چەند ڕۆژێکە لە  تۆڕە کۆمەڵایەتییەکان ژمارەیەک ناو بڵاوکراونەتەوە و گوایە ئەمانە لەلایەن وەزارەتی دادەوە لەسێدارەدراون. 

 

وێنە گەورەکە: لە ماوەی ساڵانی ڕابردوودا بەگوێرەی یاسای ژمارە چواری ڕووبەڕووبوونەوەی تیرۆر، لە عێراق سزای لەسێدارەدان بەسەر سەدان کەس جێبەجێ کراوە.

 

لێدوانی فەرمی: ئەحمەد لعێبی، گوتەبێژی وەزارەتی دادی عێراق ئەمڕۆ پێنجشەممە ڕایگەیاند، ئەو لیستە ڕەتدەکەینەوە کە بڵاوکراوەتەوە، گوایە لە ڕۆژی 19-6-2024 کە دەکاتە ڕۆژانی جەژن ژمارەیەک زیندانی لەسێدارە درابن.

 

زانیاری زیاتر: وەزارەتی داد ڕایگەیاندووە، داوای یاسایی لەسەر هەموو ئەو پێگانە تۆماردەکەن کە ئەم هەواڵەیان بڵاوکردووەتەوە.

 

باکگراوند: ساڵی ڕابردوو وەزارەتی داد بەشێوەیەکی فەرمی ڕایگەیاند، لە کۆی 20 هەزار زیندانی  کە بەتۆمەتی تیرۆر دادگایی کراون، سزای لەسێدارەدان بۆ هەشت هەزار کەس دەرچووە.