پۆلیسی نەرویج نەیتوانی پەنابەرێکی کورد دیپۆرت بکاتەوە

ئاڤا نیوز

 

دوێنێ فڕۆکەیەکی نەرویجی ویستوویەتی پەنابەرێکی ڕۆژهەڵاتی کوردستان لە وڵاتەکەی بەرەو تورکیا ببات لەوێوە دیپۆرتی ئێران بکرێتەوە، بەڵام دوای ئەوەی هەوڵی خۆکوشتنی داوە پرۆسەکە ڕاگیراوە.

 

وێنە گەورەکە: چەند ساڵێکە بەشێک لە وڵاتانی ئەوروپا ڕێکارەکانی پێدانی مافی مانەوە بە پەنابەران قورسکردووە، بەو هۆیەوە پرۆسەی دیپۆرتکردنەوە لە چەند وڵاتێک وەک سیاسەتێکی نوێ پەیڕەو دەکرێت.

 

لێدوانی فەرمی: فواد خاکی بەیگی ئەندامی سەرکردایەتی حزبی دیموکراتی کوردستان - ئێران بە ئاڤا نیوزی گوت : ئەو کەسە ناوی فواد عەلیمورادە و خەڵکی سەرپێلی زەهاوە، ئەندامی حیزبی دیموکراتی کوردستانی ئێرانە، ماوەی هەشت ساڵە لە کەمپەکانی نەرویج دەژیت، بەڵام ئەو وڵاتە دوێنێ چوارشەممە ویستوویەتی دیپۆرتی تورکیای بکاتەوە، ئەویش لەناو فڕۆکە هاواری کردووە و بەرهەڵستی کردووە، گەڕێندراوەتەوە بۆ کەمپی (لینا) لە نەرویج.

 

زانیاری زیاتر: فواد خاکی بەیگی ئەوەشی گوت، لەڕێگەی پەیوەندییەکانی حیزب لە نەرویج لە هەوڵدان بۆ چارەسەرکردنی کێشەی فواد عەلیموراد.

 

لەلایەکی دیکەوە: ڕێکخراوی مافی مرۆڤی هەنگاو ڕایگەیاندووە، "ئەو پەنابەرە لە فڕۆکەخانەی تورکیا هەوڵیداوە خۆی بکوژێت، ئەمە وایکردووە دیپۆرتکردنەوەکەی ڕابگیرێت".