گرووپە چەکدارەکان سوودانی تووڕە دەکەن

ئاڤا نیوز

 

محەممەد شیاع سوودانی سەرۆکوەزیرانی عێراق، هەوڵ دەدات کۆنترۆڵی بڕیاری گرووپە چەکدارەکانی نزیک لە ئێران بکات بە کۆتاییهێنان بە ئاگربەست لەگەڵ ئەمریکا.

 

وێنە گەورەکە: دوای دانانی وادەیەک لەلایەن گرووپێکی چەکداریی بە ناوی مقاوەمەی ئیسلامی، ڕۆژی چوارشەممەی ڕابردوو کۆتاییهاتنی ئەو وادەی ڕاگەیاند و هەڕەشەی دەستپێکردنەوەی هێرشەکانیان دەکەن. 

 

زانیاریی بەدەستهاتوو: بەگوتەی سەرچاوە عێراقییەکان بۆ ڕۆژنامەی شەرقولئەوسەت، سەرکردەکانی چوارچێوەی هەماهەنگی گفتوگۆیان لەبارەی تێگەیشتن لە بڕیاری گرووپە چەکدارەکان بۆ دەرچوونی هێزەکانی ئەمریکا کردووە، محەممەد شیاع سوودانی، سەرۆکوەزیرانی عێراق لە هەوڵی هەندێک لە گرووپە چەکدارەکان بۆ پێشێلکردنی دەسەڵاتەکانی حکومەت لە دۆسیەی کشانەوەی هێزەکانی ئەمریکا نیگەرانە، لەکاتێکدا حکومەت کاردەکات بۆ ئەوەی خشتەیەک دیاری بکات بۆ کشانەوەیان.

 

ئەوەی لەبارەیەوە دەگوترێت: هەندێک لە سەرکردەی حیزبە شیعییە میانڕەوەکان ترسی ئەوەیان هەیە هەڵکشانی گرژییە هەرێمییەکان لەنێوان ئیسرائیل و ئێران لە باشووری لوبنان پەلبهاوێژێت بۆ عێراقیش. 

 

زانیاریی زیاتر: عەقیل عەباس، شرۆڤەکاری سیاسی دەڵێت، سوودانی تووڕەیە لە گرووپە چەکدارەکان و لەناو چوارچێوەی هاوئاهەنگیش ناڕەزایەتی لە دژیان دەربڕیوە و داوای هەڵویستی جددی کردووە، هەوڵیش دەدات ئێرانیش گوشار لە گرووپە چەکدارەکان بکەن هێرشەکانیان لە دژی هێزەکانی ئەمریکا لە عێراق دەستپێنەکەنەوە.