كۆمەڵەی زەحمەتكێشانی كوردستان: ئاسایشی سلێمانی فشار دەکات کەمپەکان چۆڵ بکەین

ئاڤا نیوز

 

حیزبەكانی ڕۆژهەڵاتی كوردستان دەڵێن، لەلایەن ئاسایشی سلێمانییەوە فشاریان لێ كراوە كەمپەكانی زڕگوێز و دەوروبەری چۆڵ بكەن، بەڵام ئەوان ڕەتیان كردووەتەوە.

 

وێنە گەورەکە: بەپێی ڕێكکەوتنی ئەمنیی عێراق و ئێران، دەبێت حیزبە ئۆپۆزیسیۆنەكانی ڕۆژهەڵاتی کوردستان چەک دابنێن و قەڵا و بارەگاكانیان چۆڵ بكەن و بچنە كەمپی دیاریکراوەوە، بەڵام هیچكام لەو حیزبانە ئامادەنین ئەو كارە بكەن.

 

لێدوانی فەرمی: ئەمجەد حوسێن پەنای، ئەندامی سەركردایەتیی كۆمەڵەی زەحمەتكێشانی كوردستان بە ئاڤا نیوزی ڕاگەیاند: "ئاسایش فشاری خستتوینەتە سەر تا كەمپەكان چۆڵ بكەین، ئێمە ڕەتمان كردووەتەوە و ئامادەنین ئەو كارە بكەین".

 

لە لایەکی دیکەوە: حەسەن قادر زادە، ئەندامی باڵای حیزبی دیموكراتی كوردستان بە ئاڤا نیوزی گوت: "تاوەکو ئێستا ئەو فشارە لەسەر ئێمە نەبووە، بەڵام هەر لایەک فشارمان لێ بكات قبوڵی ناكەین".

 

زانیاریی بەدەستهاتوو: پێش ئەوەی عەلی باقری، سەرپەرشتیاری وەزارەتی دەرەوەی کۆماری ئیسلامی لە نێوەڕاستی ئەم مانگە سەردانی هەرێمی كوردستان بكات، ئاسایشی یەكێتی بە حیزبەکانی ڕۆژهەڵاتی گوتووە، دەبێت كەمپەكانی كۆیە و زڕگوێز و قەڵای کۆیە چۆڵ بكەن و بچنە كەمپی باریكە و عەربەت و کۆیە، بەڵام كۆمەڵە ڕەتی كردووەتەوە.

بۆچوونی بەرامبەر: ئاڤا نیوز لەبارەی ئەم بابەتە چەندینجار پەیوەندی بە ئاسایشی سلێمانییەوە كرد، بەڵام ئامادە نەبوون قسە لەسەر ئەم بابەتە بکەن.