ئەنجوومەنی وەزیران بۆ وەزارەتی دارایی: پەلە بکەن لە ناردنی لیستی مووچەی مانگی شەش بۆ بەغدا

ئاڤا نیوز

 

لە کۆبوونەوەی ئەمڕۆی ئەنجوومەنی وەزیران وەزارەتی دارایی ڕاسپێردرا، پەلە بکات لە ناردنی لیستی مووچەی مانگی شەش بۆ بەغدا.

 

ڕاگەیێنراوی فەرمی: ئەنجوومەنی وەزیران بە سەرپەرشتئی سەرۆکوەزیران بارزانی و ئامادەبوونی قوباد تاڵەبانی جێگری سەرۆکوەزیران، کۆبووەوە و تاوتوێی پرسی کارەبا و دوایین پەرەسەندنەکانی بابەتی مووچەی مووچەخۆرانیان کرد.

 

هۆکارە زانراوەکان: وەزیری کارەبا هۆکارەکانی کەمیی کارەبای بۆ کەمی غازی سرووشتی پێویست بۆ بە بەگەڕخستنی یەکەکانی بەرهەمهێنانی کارەبا و گەشەی ساڵانەی هاوبەشانی کارەبا و زیادبوونی خواست لەسەر کارەبای گەڕاندەوە.

 

خاڵی ئەرێنی: ئەنجوومەنی وەزیران پێشنیارێکی وەزیری کارەبای پەسەند کرد کە تایبەتە بە داشکاندنی ڕێژەی %20ـی پارەی کەڵەکەبووی کارەبای هاونیشتمانییان و بڕیاردرا تاوەکو 2024/7/31 داشکاندنەکە بەردەوام دەبێت.

 

زانیاریی زیاتر: ئەنجوومەنی وەزیران هەڵوێستی خۆی دووپاتکردەوە کە خوازیاری چارەسەرکردنی کێشە و بەربەستەکانی بەردەم خەرجکردنی مووچەی هەرێمی کوردستانە، سەرجەم وەزارەتەکانیش ڕاسپێردران کە بەردەوام بن لەسەر ناردنی لیستی مووچەی مووچەخۆران و تەرازووی پێداچوونەوەی مانگانەی داهات، خەرجی و میلاک لە کاتی خۆیدا.

 

گۆشەیەکی دیکە: سەبارەت بە مووچەی مانگی پێنجی هێزەکانی پێشمەرگە و دامەزراوە ئەمنیەکانیش، داواکرا کە وەزارەتی دارایی عێراق، بە زووترین کات مووچەکانیان خەرج بکات بە تایبەتیش هیچ بيانوویەک بۆ نەناردنی مووچەکانیان نەماو.