سوننە و شیعە ڕێککەوتوون بۆ هەڵبژاردنی سەرۆکێک بۆ پەرلەمان

ئاڤا  نیوز

 

لایەنە سوننە و شیعییەکان ڕێککەوتوون بۆ گرێدانی دانیشتنێکی پەرلەمان پەیوەست بە هەڵبژاردنی سەرۆکی پەرلەمان و بڕیارە هەفتەی داهاتوو دانیشتنی پەرلەمان بکرێت.

 

وێنە گەورەکە: قەیرانی هەڵبژاردنی سەرۆکێک بۆ پەرلەمان ماوەی زیاتر لە حەوت مانگە بەردەوامە، ناکۆکیی نێوان لایەنە سوننەکان لەسەر بەربژێرک و دابەشبوونی لایەنە شیعە و کوردییەکانیش هۆکار بووە لەوەی نەتوانرێت سەرۆکێک بۆ پەرلەمان هەڵبژێردرێت.

 

زانیاریی بەدەستهاتوو: پەرلەمانتارێکی سوننە کە ناوەکەی ئاشکرا نەکراوە، ئەوەی بە میدیای عێراق گوتووە: "ڕێککەوتن لەنێوان فراکسیۆنە سوننەکان و چوارچێوەی هەماهەنگی کراوە بۆ گرێدانی دانیشتنێکی نائاسایی پەرلەمان بۆ هەڵبژاردنی سەرۆکی نوێی".

 

زانیاریی زیاتر: بڕیارە موحسین مەندەلاوی، سەرۆکی پەرلەمان بەوەکالەت هەفتەی داهاتوو ئەندامانی پەرلەمان بۆ ئەو مەبەستە ئاگادار بکاتەوە.

 

ئەمەش بزانە: شەوی دووشەممە 24-6-2024 هاوپەیمانی ئیدارەی دەوڵەت بە ئامادەبوونی هێزە سەرەکییەکانی پێکهێنەری حکومەتی عێراق لە کۆشکی حکومی لە بەغدا پەیوەست پرسی هەڵبژاردنی سەرۆکێک بۆ پەرلەمان و چەند پرسێکی دیکە کۆبووەوە.