عێراق جەخت لە گرنگی پەرەپێدانی هاوکاری دووقۆڵی لەگەڵ ناتۆ دەکاتەوە

ئاڤا نیوز

 

سەرۆکوەزیرانی عێراق جەخت لە گرنگی گەشەپێدانی هاوکاری دوو لایەنە لە بواری مەشق و هەماهەنگیی زانیاری لەگەڵ نوێنەرایەتیی هاوپەیمانیێتیی باکووری ئەتڵەسی "ناتۆ" لە عێراق دەکاتەوە.

 

بۆچی گرنگە: نێردەی ناتۆ لە عێراق لەڕێگەی 500 کارمەندەوە لە ساڵی 2018ـەوە مەشق و راھێنان بە ھێزە ئەمنییەکانی عێراق دەکات.

 

چیرۆکی سەرەکی: پێنجشەممە 27-6-2024 محەممەد شیاع سوودانی، سەرۆکوەزیرانی عێراق لە بەغدا پێشوازی لە لوکاس شروێرس، فەرماندەی نوێنەرایەتیی هاوپەیمانیێتیی باکووری ئەتڵەسی "ناتۆ" لە عێراق کرد.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: لە دیدارەکەدا سەرۆکوەزیران جەختی لە گرنگی پەرەپێدانی هاوکاری دووقۆڵی لەگەڵ ناتۆ لە بوارەکانی مەشق و هەماهەنگیی زانیاری لەگەڵ هێزە چەکدارەکانی عێراق لە دوای کۆتایی هاتنی ئەرکی هاوپەیمانیی نێودەوڵەتی لە عێراق کردەوە.

 

لەلایەکی دیکە: ژەنەڕاڵ شروێرس سوپاس و پێزانینی خۆی ئاراستەی حکومەت کرد بۆ پاڵپشتیکردنی ئەو ئەرکە و دابینکردنی ئاسانکاری پێویست بۆ کارەکانی لە عێراق.