کۆچ و کۆچبەرانی عێراق گەڕانەوەی ژمارەیەک ئاوارەی دیکە بۆ شنگال ڕاگەیاند

ئاڤا نیوز

 

وەزارەتی کۆچ و کۆچبەرانی عێراق گەڕاندنەوەی 569 ئاوارەی دیکە بۆ شنگال ڕاگەیاند، لەگەڵ ئەمەشدا پرۆسەی گەڕانەوەی ئاوارەکان خاوە.

 

وێنە گەورەکە: 300 هەزار ئاوارەی شنگال لە هەرێمی کوردستانن، حکومەتی عێراق بڕیاری داوە تاوەکو 30 تەممووزی ئەمساڵ، سەرجەم کەمپەکان لە هەرێمی کوردستان دابخات و بەشێکی زۆری ئاوارەکان نایانەوێت بگەڕێنەوە.

 

ڕاگەیێنراوی فەرمی: وەزارەتی کۆچ و کۆچبەرانی عێراق لە ڕاگەیێنراوێکدا ئاماژەی بەوەداوە، ئەو ئاوارانە لە دەرەوەی کەمپەکان دەژیان و لە کۆمەڵگەی شاریا و گوندەکانی سەر بە کۆمەڵگەکە نیشتەجێبوون، ئەمڕۆ گەڕانەوە بۆ ناوچە ڕەسەنەکانیان لە قەزای شنگال.

 

زانیاریی زیاتر: گەڕانەوەی ئەو خێزانانە بە هەماهەنگی لەگەڵ ڕێکخراوی نێودەوڵەتیی کۆچ (IOM) و فەرماندەیی ئۆپەراسیۆنەکانی نەینەوا بووە و پاڵپشتی لۆجستیشیان بۆ دابین کراوە.

 

ئەوەی پێشبینی دەکرێت: هیچ هەنگاوێک بۆ ئاساییکردنەوە و فەراهەمکردنی خزمەتگوزاری بۆ شنگال نەنراوە، بۆیە بەشێکی ئاوارەکان ئامادە نین بگەڕێنەوە و پێشبینیش ناکرێت لەوکاتەی دیاریکراوە کەمپەکان دابخرێن.