عەللاوی: عێراق لە شەڕێکی ڕانەگەیێنراوی ناوخۆییدا دەژی

ئاڤا نیوز

 

سەرۆکوەزیرانی پێشووتری عێراق هۆشداری دەدات لەوەی پێکهاتەکانی عێراق لە شەڕێکی ڕانەگەیێنراوی ناوخۆییدا دەژین و ڕەخنەی تووندیش لە واشنتن دەگرێت.

 

وێنە گەورەکە: ئەیاد عەلاوی، سەرۆکی هاوپەیمانیی وەتەنیە لە چەندین بۆنەو دیداری جیاوازدا، لەبارەی دەستوەردانی دەرەکی و ئەو لێکەوتانەی لە ئەنجامی یەکلاکردنەوەی ململانێکانی نێوان ئێران و ئەمریکا لە خاکی عێراق و بوونی چەک لە دەستی هێزە نا یاساییەکان و چەندین پرسی دیکە هۆشداری داوە.

 

لێدوانی فەرمی: ئەیاد عەلاوی، لە دیمانەیەکی لەگەڵ ڕۆژنامەی "زە ناشیوناڵ"ـی بەریتانی ڕایگەیاندووە: "ئێستا شەڕێکی ڕانەگەیێنراوی ناوخۆیی لە عێراق هەیە، من دژی داگیرکاری و جەنگ بوومە، بەڵام ئەمریکییەکان دەیانویست وڵات دابەشی سەر سوننە و شیعە بکەن".

 

زانیاریی زیاتر: عەللاوی ئەوەشی گوت، پێشتر ململانێیەکان لەنێوان سوننە و شیعە بوون، بەڵام ئێستا دەبینین شیعە لە بەرامبەر سوننە، شیعە لە دژی خۆیان و سوننە لە دژی خۆیان، تەنانەت سوننەکان ناتوانن سەرۆکێک بۆ پەرلەمان دەستنیشان بکەن.

 

لەلایەکی دیکە: عەللاوی ئەمریکا بە بەرپرسیار دەزانێت "لە دروستکردنی دابەشبوونێک لە وڵاتدا لەنێوان سوننە و شیعە و کورد و هەڵگیرسانی گرژییە تائیفیەکان".