50 فەرمانبەری حکومەت بۆ ڕاهێنان دەنێردرێنە کۆریای باشوور

ئاڤا نیوز

سەرۆکی ڕێکخراوی کۆیکای کۆری دەڵێت "بەردەوامن لەسەر ڕاهێنان بە کارمەندانی حکومەتی هەرێمی کوردستان لە کۆریای باشوور و کارکردنیان لەسەر کارنامەی کابینەی نۆیەمی حکومەتی هەرێمە.

وێنە گەورەکە: لە ساڵی 2004-ەوە کۆریای باشوور لە هەرێمی کوردستان چەندین پڕۆژەی ستراتیژی ئەنجامداوە، ئێستاش ڕێکخراوی KOICAی کۆری بەردەوامە لە پڕۆژەکانی.

لێدوانی فەرمی: کیم سیئۆک بێرم، سەرۆکی ڕێکخراوی کۆیکا بۆ ئاڤا نیوز گوتی: بەردەوامین لەسەر کردنەوەی خول بۆ فەرمانبەرانی حکومەتی هەرێم لە کۆریا، ئەمساڵ دوو تا سێ خولمان دەبێت و هەر جارێک 18 بۆ 25 فەرمانبەری فەرمانگەکانی حکومەت دەنێرینە کۆریا.

زانیاریی زیاتر: سەرۆکی ڕێکخراوی کۆیکا گوتیشی: لەماوەی بیست ساڵی ڕابردوودا ڕاهێنانمان بە هەزار و 500 کارمەندی حکومەتی هەرێمی کوردستان لە کۆریا کردووە.

ئەوەی پێویستە بیزانیت: KOICA ڕێکخراوێکی حکومی کۆریای باشوورە، لەسەر بنەمای باجی هاووڵاتییانی کۆریا کارە خێرخوازییەکانی لە 44 وڵات ئەنجام دەدات، لەم نێوەندە لە هەرێمی کوردستانیش ئۆفیسیان هەیە، دواین پڕۆژەیان "بە ئەلیکترۆنیکردنی سیستەمی گرێبەستە گشتییەکان" بووە.