یەكێتی جەخت لە پارێزگارێكی  سەر بە حیزبەكەی لە كەركووك دەكاتەوە

ئاڤا دیجیتاڵ

ئەندامێکی مەکتەبی سیاسی یەکێتی نیشتیمانیی کوردستان دەڵێت "یەکێتی سوورە لەسەر دانانی کەسێکی حیزبەکەی وەک پارێزگاری کەرکووک".

بۆچی گرنگە: لەدوای ڕووداوەکانی ساڵی 2017 ەوە پارێزگاری کەرکووک لەدەست کورددا نەماوە، دوای هەڵبژاردنی ئەنجوومەنی پارێزگاکان کە لە کەرکووکیش بەڕێوەچوو، پارتی دوو کورسی و یەکێتی پێنج کورسی پارێزگاکەیان بەدەستهێنا، تائێستاش گفتوگۆکان بۆ دانانی پارێزگارێک بۆ شارەکە بەردەوامن.

لێدوانی فەرمی: ڕۆژی سێشەممە 6-2-2024 شاندێکی یەکێتی نیشتیمانی کوردستان سەردانی یەکگرتووی ئیسلامی کوردستانی کرد لەشاری سلێمانی، لەمیانی سەردانەکەدا میران محەممەد ئەندامی مەکتەبی  سیاسی یەکێتی ڕایگەیاند:  کۆبوونەوەی یەکێتی و پارتی زۆر باش بووە و لێکتێگەیشتنی باش هەبووە لەسەر پرسی دانانی پارێزگارێک بۆ کەرکووک کە هەموو لایەنەکان کۆکبن لەسەری.

سەبارەت بە دانانی کەسێکی نیشتیمانی بێلایەن یاخود کەسێکی حیزبی سەر بە یەکێتی گوتی: یەکێتی سوورە لەسەر ئەوەی پارێزگار ئەبێت سەر بە یەکێتی بێت.

ئەوەی پێویستە بیزانیت: رۆژی یەکشەممە 4-2-2024 شاندێکی پارتی دیموکراتی کوردستان لەسەر ئاستی باڵا و بە سەرکردایەتی فازڵ میرانی سکرتێری مەکتەبی سیاسی پارتی، لەگەڵ شاندی یەکێتی نیشتیمانیی کوردستان بەسەرکردایەتی بافڵ تاڵەبانی سەرۆکی یەکێتی کۆبوونەوە و ئەنجامەکانی کۆبوونەوەکەیان لە چەند خاڵێکی هاوبەشدا راگەیاند.