دۆسیەی ئەمنیی بەشێک لە پارێزگاکان ڕادەستی پۆلیسی خۆجێی نەکراوەتەوە

ئاڤا نیوز 

نوێنەری حکومەتی هەرێمی کوردستان لە فەرماندەیی هێزە هاوبەشەکانی عێراق ڕایگەیاند، تەنیا دۆسیەی ئەمنیی حەوت پارێزگای عێراق ڕادەستی هێزە ناوخۆییەکان کراوە.

وێنە گەورەکە: دوای تێکشکاندنی داعش و گرتنەوەی شارەکان لە لایەن سوپاوە، دۆسیەی ئەمنی کەوتە دەست سوپا، سەرۆکی ئەنجوومەنی وەزیرانی عێراقیش بڕیاری گەڕانەوەی دۆسییەی ئەمنیی بۆ هێزە ناوخۆییەکانی پارێزگاکان داوە.

لێدوانی فەرمی: عەبدولخالق تەڵعەت، نوێنەری حکومەتی هەرێمی کوردستان لە فەرماندەیی هێزە هاوبەشەکانی عێراق بە ئاڤا نیوزی گوت: پێویستە ڕادەستکردنەوەی پارێزگاکان بە هێزە نێوخۆییەکان لە هەموو شوێنێک جێبەجێ بکرێت، بە کەرکووک و شنگالیشەوە.

زانیاریی زیاتر: "بریاربوو لە خەڵکی شنگال چەند هەزار کەسێک وەک پۆلیس دابمەزرێن، بەڵام تا ئێستا ڕێککەوتنی شنگال جێبەجێ نەکراوە، پێویستە تا کۆتایی ئەمساڵ هەموو هێزە نایاساییەکان بە پەکەکەشەوە شارەکە بەجێبهێڵن و دۆسیەی ئەمنی شارەکە ڕادەستی پۆلیس بکرێت".عەبدولخالق تەڵعەت وای گوت.

ئەوەی پێویستە بیزانیت: تا ئێستا دۆسیەی ئەمنی حەوت پارێزگای عێراق ڕادەستی هێزە ناوخۆییەکان کراوەتەوە.